... ഒരു ചായ ഫിലോസഫി ...

ഈയിടെ IT ജീവിതം മടുത്തു , മാനേജർ മാത്തപ്പനും സഹായി സഹദേവനും കൂടി , കോവളത്തൊരു ചായക്കട തുടങ്ങി...

അതാകുമ്പോൾ , അവരുടെ ജീവിത ലക്ഷ്യമായ " വിദേശികൾക്ക് ദിവസവും ഉത്തമ കസ്റ്റമർ സർവീസ്" എന്ന ലക്‌ഷ്യം തുടരുകയും ചെയ്യാം; ജോലിയില്ലാതെ ആയാൽ പട്ടിണി കിടന്നു വിശന്നു ചാകാതെ സ്വയം ചായ ഉണ്ടാക്കി കുടിച്ചെങ്കിലും ജീവിച്ചു പോവുകയും ചെയ്യാം ..!

ഒരു ദിവസം , ചായക്കടയിൽ നാല് സായിപ്പന്മാർ വന്നു , നാല് ചൂട് ചായ ഓർഡർ ചെയ്തു. അവർക്കു നാല് ടൈപ്പ് കപ്പുകളിൽ ചായ സെർവ് ചെയ്തത് കണ്ടു , അവർ ഓരോരുത്തരും മറ്റുള്ളവരുടെ കപ്പുകൾ നോക്കി പരിഭവിച്ചു, ഹോട്ടൽ മുതലാളി മാത്തപ്പനോട് ചൂടായി ...

" ഇതെന്താണ് , നാല് പേർക്ക് നാല് ടൈപ്പ് കപ്പുകൾ ! എല്ലാർക്കും ഒരേ പോലെ നിങ്ങള്ക്ക് ചായ തന്നൂടെ ?!!! "

അവരെ നോക്കി പുഞ്ചിരിച്ചു, മുതലാളി മാത്തപ്പൻ, പഴയ IT ശീലം വെച്ച് , ശാന്തമായി കസ്റ്റമേരോട് മൊഴിഞ്ഞു ;

" നോക്കൂ .... നമ്മുടെയൊക്കെ ജീവിതം ഇത് പോലെയാണ് .... ഓരോരുത്തരും അവർക്കു കിട്ടിയ കപ്പുകൾ ( മെറ്റീരിയൽ തിങ്ങ്സ് ) നോക്കി , അതിനെ മറ്റുള്ളവരുടെ കപ്പുകളുമായി താരതമ്യം ചെയ്തു , പരിഭവിച്ചു കൊണ്ട് ; എല്ലാവരുടെയും കപ്പിലും നിറഞ്ഞിരിക്കുന്നതു ഒരേ സൃഷ്ട്ടാവ് ഉണ്ടാക്കിയ , ഒരേ രുചിയും മണവും ഉള്ള ചായയാണ് എന്ന സത്യം തിരിച്ചറിയാതെ ; അത് കുടിക്കുന്നത് ആസ്വദിക്കാതെ , ബാഹ്യമായ കപ്പുകളെ കുറിച്ചോർത്തു , വിലപ്പെട്ട സമയം പാഴാക്കുകയാണ്‌... " !!

ആ ഫിലോസഫി കേട്ട്, മനസ്സും കണ്ണും നിറഞ്ഞു , കസ്റ്റമേഴ്സ് മുതലാളിയോട് തങ്ങളുടെ അറിവില്ലായ്മയ്ക്കു മാപ്പു ചോദിക്കുകയും , ചായ സന്തോഷത്തോടെ കുടിച്ചു , കാശും കൊടുത്തു , നാളെയും വരാമെന്നു പറഞ്ഞു തിരിച്ചു പോവുകയും ചെയ്തു ...

അവരെ സ്നേഹത്തിൽ ടാറ്റാ പറഞ്ഞു യാത്രയാക്കി , മുതലാളി അടുക്കളയിൽ നിന്നും ചായ സൃഷ്ട്ടാവായ സഹദേവനെ അടുത്തേക്ക് നീട്ടി വിളിക്കുകയും , അവന്റെ ചെവിയിൽ , കടുത്ത ഫിലോസഫികൾ , മറ്റു കസ്റ്റമേഴ്സ് കേൾക്കാതെ പറയുകയും; IT ഫീൽഡ് പോലെ എപ്പോഴും ഇങ്ങനെ ഓരോന്ന് പറഞ്ഞു കസ്റ്റമെറിന്റെ അടുത്ത് രക്ഷപ്പെട്ടു പോകാൻ പറ്റില്ലെന്നും, ചായക്കടയിൽ നല്ലോണം പണിയെടുത്തു ജീവിക്കണമെന്നും ഉപദേശിച്ചു .

< The End >