.... April 12th - മലയാളം ബ്ലോഗേഴ്സ് - 'ചോദിക്കൂ പറയാം ' പരിപാടി ...

[എനിക്ക് ജീവിതത്തിലെ മറക്കാനാവാത്ത ഒരു ദിവസം സമ്മാനിച്ചതിന് വളരെ നന്ദി ദിവ്യ , സുധി , ശാരി ചേച്ചി , ആർഷ , ഉട്ടോപ്യൻ , കെ ഡി , രാജേശ്വരി , വിനുവേട്ടൻ , പിന്നെ എല്ലാ മലയാളം ബോൾഗേര്സ് കുടുംബാങ്ങങ്ങളെ ..... ]

Divya :

ഷഹീം

ഷഹീമിനോട് 12.01am മുതൽ ചോദിക്കാം .

7am to 10am live ഉണ്ടാകും എന്നും പറഞ്ഞു . ബാക്കി സമയങ്ങളിൽ വരുന്ന ചോദ്യങ്ങൾക്ക് സമയം പോലെ മറുപടി തരാമെന്നു പറഞ്ഞിട്ടുണ്ട് !!! 🥰

Shaheem :

പ്രിയമുള്ളവരേ … എന്റെ പേര് ഷഹീം …1979 -ഇൽ തിരുവനന്തപുരത്തിൽ ജനനം  .. കുട്ടിക്കാലം കണ്ണൂർ ജില്ലയിൽ  … പിന്നീട് ഞാൻ പഠിച്ചതും വളർന്നതും കൊല്ലം ജില്ലയിൽ …. അങ്ങനെ , തെക്കുള്ളവർ വടക്കനെന്നും  , വടക്കുള്ളവർ തെക്കനെന്നും പറഞ്ഞു , ഞാൻ ഒരു ദിക്കില്ലാത്തവനായി !! ആ കാലഘട്ടത്തിലെ ട്രെൻഡായ കംപ്യുട്ടർ പഠിച്ചു , ഇപ്പോൾ സോഫ്റ്റ്‌വെയർ മേഖലയിൽ ജോലിചെയ്യുന്നു ..2005 -ഇൽ  തിരുവനന്തപുരം ടെക്നോപാർക്കിൽ നെസ്റ്റ് കമ്പനിയിൽ തുടങ്ങിയ എന്റെ ഔദ്യോഗിക ജീവിതം ഇപ്പോൾ അമേരിക്കയിൽ കാലിഫോർണിയ ലോസ് ആഞ്ചലസ്‌ നഗരത്തിൽ TCS കമ്പനിയിൽ എത്തി നിൽക്കുന്നു … ഈ ഭൂലോകത്തിന്റെ സ്പന്ദനം പല്ലുകളിലാണെന്നു വിശ്വസിക്കുന്ന  , ഭാര്യ ഷമീന ( ഡെന്റിസ്റ്റു  ആണ്) … മൂന്നു പെൺകുട്ടികൾ - വഫാ ( 11 വയസ്സ് ) , അയേഷ (  6 വയസ്സ് ) , ആംനാ  ( 11 മാസം ) …

ഇനിയിപ്പോൾ കൂടുതൽ വിശേഷങ്ങൾ ചോദ്യോത്തരങ്ങളിലൂടെ പതിയെ പറയാം …. ഇനി അപ്പോൾ , അങ്ങനെയാവട്ടെ ……... :)

Sudhi :

അയ്യോ.... ചേട്ടനായിരുന്നോ? ഞാൻ സമപ്രായം ആണെന്ന് കരുതി നാലഞ്ച് വർഷമായി പേരാണ് വിളിച്ചുകൊണ്ടിരുന്നത്. ക്ഷമിയ്ക്കണേ..... 🏻

Shaheem:

ഒരു മയത്തിലുള്ള ഈസ്സി ചോദ്യങ്ങൾ ചോദിക്കണേ കൂട്ടുകാരേ.....

Sudhi :

1.ayikar എന്നത്????

'ആയിക്കാർ' എന്നത് എന്റെ കുടുംബ പേരായ 'ആയിക്കാരകത്തു പുതിയപുരയിൽ' എന്നതിന്റെ ചുരുക്ക പേരാണ് … എന്റെ മുഴുവൻ പേര് 'ഷഹീം ആയിക്കാരകത്തു പുതിയപുരയിൽ' എന്നതാണ് . ഇവിടെ അമേരിക്കയിൽ എത്തിയ ശേഷം , സായിപ്പന്മാർ ലാസ്‌റ് നെയിം ആയ 'ആയിക്കാരകത്തു പുതിയപുരയിൽ' വിളിക്കുന്ന ഓരോരോ പുതിയ പേരുകൾ കേട്ട് , സഹിക്കാൻ പറ്റാതെ , ചുരുക്കി ഞാൻ അതിനെ 'ആയിക്കാർ' എന്നാക്കിയതാണ് …. ഈ വിമൽകുമാർ എന്ന് കുഞ്ഞിക്കൂഞ്ഞൻ വിളിക്കുന്ന പോലെ , 'പി ആർ ആകാശ് ' എന്ന് പ്രകാശൻ വിളിച്ച പോലെ ഒരു ഉടായിപ്പു …. !!!

2.ബ്ലോഗിൽ എത്തപ്പെട്ടത് എങ്ങനെ?

2007  - 2008 കാലഘട്ടത്തിൽ അമേരിക്കയിൽ എനിക്ക് തനിയെ താമസിക്കേണ്ടി വന്നപ്പോൾ ,  അവിടെ വെച്ച് പരിചയപ്പെട്ട ഒരു മലയാളി സുഹൃത്താണ് ബ്ലോഗുകളെ പറ്റി പറഞ്ഞത് . ഞാൻ വിചാരിച്ചതു ഇത് ഡയറി എഴുതുമ്പോൾ സ്വകാര്യമായ ഒന്നാണ് എന്നാണ് . അങ്ങനെ ആദ്യമായി 2008 ജൂൺ 24  ഇന്  , 'എന്റെ ലോകം' എന്നൊരു ബ്ലോഗും , 'എന്റെ ദുഃഖം' എന്ന ആദ്യ പോസ്റ്റും പിറന്നു … http://shaheemayikar.blogspot.com/2008/06/blog-post.html

Sari Chechi :

1. താങ്കൾ എൻജിനീയറിങ് പഠിച്ചത് എവിടെയാണ്? എൻജിനീയറിങ് ൽ ഏതാണ് പഠിച്ചത്?

ഞാൻ പഠിച്ചത് MCA ആണ് …കൊല്ലത്തു  TKM എഞ്ചിനീയറിംഗ് കോളേജിൽ , 2004 ബാച്ച് പാസ് ഔട്ട് …. പ്രീഡിഗ്രി മാർക്ക് വളരെ കുറഞ്ഞത് കൊണ്ട് , എഞ്ചിനീയറിംഗ് ചേരാനുള്ള യോഗ്യത കിട്ടിയില്ല … അത് കൊണ്ട് നാല് കൊല്ലം എഞ്ചിനീറിങ്ങിനു പ്രകാരം , മൊത്തം ആറു കൊല്ലം ( BSc മൂന്നും ,MCA മൂന്നും ) കോളേജ് ജീവിതം കിട്ടി എന്നതിൽ വളരെ സന്തുഷ്ടനാണ് …..

2. എഞ്ചിനീയറിംഗ് തന്നെ ആയിരുന്നോ ലക്ഷ്യം?

ഒരിക്കലുമല്ല …. സത്യം പറഞ്ഞാൽ എനിക്ക്  വലിയ ലക്ഷ്യങ്ങൾ ഒന്നും ഉണ്ടായിരുന്നില്ല …. ഓരോ കോഴ്സ് തീരുമ്പോൾ 'അടുത്ത ഏറ്റവും നല്ല ഓപ്ഷൻ ' എന്ന ഒരു  രീതിയിൽ , അങ്ങനെ അങ്ങ് പോയതാണ് ….. :)

3.താങ്കളുടെ ക്വോട്ടുകൾ എന്ന് പറഞ്ഞ് എഴുതി വെച്ചിരിക്കുന്നത് സ്വന്തം കൃതി തന്നെയാണോ?

അതെ ശാരി ചേച്ചി … ഓരോരുത്തർ വല്ലവരുടെയും കോട്ടുകൾ ഷെയർ ചെയ്യുന്നത് കണ്ടപ്പോൾ , എന്ത് കൊണ്ട് എനിക്കും ചെലവ് കുറച്ചു, സ്വന്തമായി കുടിൽ വ്യവസായത്തിൽ കോട്ടുകൾ പറഞ്ഞു കൂടാ എന്ന തോന്നലിൽ പറഞ്ഞ /എഴുതിയ സ്വന്തം കോട്ടുകൾ ആണ് …. ഒരു നൂറു വര്ഷം കഴിയുമ്പോൾ ഇതിൽ ചിലതൊക്കെ അന്നത്തെ ജനത ഷെയർ ചെയ്യുന്ന കാലം എനിക്ക് മനസ്സിൽ കാണാം …..   http://shaheemayikarquotes.blogspot.com/

നീ സർവകലാവല്ലഭൻ മാത്രല്ല കുഞ്ഞേ...ദീർഘവീക്ഷണനും കൂടെയാണ്..

Sudhi :

3.അമേരിക്കൻ ജീവിതത്തെയും കേരളത്തിലെ ജീവിതത്തെയും (ഇപ്പോളത്തെ കൊറോണക്കാലത്തെ അടിസ്ഥാനപ്പെടുത്തി )താരതമ്യം ചെയ്യുമ്പോൾ........

ഇപ്പോഴത് കൊറോണ കാലത്തു , ഭൂമിയിൽ ഒരു സ്വർഗം ഉണ്ടെങ്കിൽ അത് നമ്മുടെ കേരളമാണ് എന്ന് തോന്നാറുണ്ട്  ….     കേരളത്തിലെ  പോലെ , ആദ്യം മുതൽ തന്നെ , സമ്പത്തിനേക്കാൾ ജനങ്ങളുടെ ജീവനും ആരോഗ്യത്തിനും ഇവിടത്തെ ഭരണാധികൾ  മുൻ‌തൂക്കം കൊടുത്തിരുന്നെങ്കിൽ എന്ന് തോന്നാറുണ്ട് …. ആദ്യകാലങ്ങളിൽ ഇവിടെ കാണിച്ച അനാവസ്ഥയ്ക്കുള്ള വലിയ വില ഇപ്പോൾ അമേരിക്ക കൊടുത്തു കൊണ്ടിരിക്കുന്നു !!! :)

Sari Chechi:

4.എല്ലാ ബ്ലോഗുകളും മെയിന്റയിൻ ചെയ്യുന്നുണ്ടോ?

ഇല്ല …. ഇപ്പോൾ പ്രധാനമായും 'ചില കഥകൾ ' എന്ന രസകരമായ കഥകൾ എഴുതുന്ന ബ്ലോഗ് ആണ് പ്രധാനമായും എഴുതുന്നത് …. 'എന്റെ ലോകം ' എന്ന ബ്ലോഗ് എനിക്ക് തമാശ അല്ലാത്ത കുറിപ്പുകൾ കുറിക്കാനുള്ള ഇടമാണ് … ഇടയ്ക്കു മൂഡ് പോലെ അവിടെ കുറിക്കും …. 'ഷഹീംസ് കൊട്ട്സ് ' ഭായി തലമുറക്കുള്ളതാണ് , അത് അശരീരികൾ ഉണ്ടാകുമ്പോൾ കുറിക്കാനുള്ള ഇടമാണ് … "

5.ജീവിതത്തിലെ പ്രധാനപ്പെട്ട മൂന്ന് ഫിമെയിൽ സ്പിരിറ്റ്‌കൾ ഉണ്ടാക്കിയ പ്രധാന മാറ്റങ്ങൾ എന്തൊക്കെ? 

'അമ്മ

ഭാര്യ

മകൾ 

അവരോട് നീതി പുലർത്തുന്ന ഒരു വ്യക്തിയാണോ താങ്കൾ? എങ്ങനെ സ്വയം വിലയിരുത്തും?

എന്റെ ജീവിതത്തിലെ 'ഹൈ കമാൻഡ്' കമ്മിറ്റി ഇവരാണ്  ….. 

'അമ്മ ; മറ്റു സ്ത്രീകളോട് എനിക്ക് ചെറുപ്പം മുതൽ തന്നെ , ബഹുമാനം ഉണ്ടാക്കിയ വ്യക്തിത്വം ….

ഭാര്യ ; പുരുഷന്മാരേക്കാൾ  വളരെയധികം സ്മാർട്ട്നെസ്  സ്ത്രീകൾക്കാണെന്നു , എനിക്ക് മനസ്സിലാക്കി തന്ന വ്യക്തിത്വം  ….

മക്കൾ ; ഒരു വീടിന്റെ  ഐശ്വര്യം അവിടത്തെ പെണ്കുട്ടികളാണെന്നു എനിക്ക് മനസിലാക്കിയ വ്യക്തിത്വങ്ങൾ …

:)

അതിലെ രണ്ടാമത്തെ ചോദ്യത്തിന് ഉത്തരം പറഞ്ഞില്ല @⁨Shaheem Ayikar⁩

ആം ദി സോറി , വിട്ടു പോയി വക്കീലേ .... എന്റെ അറിവിൽ , ഞാൻ അവരോട് നീതി കേടു ഐ കാട്ടിയിട്ടില്ല ....എന്റെ ഉമ്മായ്ക്കു ഒരു പാട് സങ്കടം കൊടുക്കാത്ത മകനാണ് ഞാൻ ... ഭാര്യയ്ക്ക് നല്ലൊരു സുഹൃത്താണ് ഞാൻ ... മക്കൾക്ക് അവരെ ചിരിപ്പിക്കുന്ന 'ഫണ്ണി ബാപ്പ ' ആണ് ഞാൻ .... ഇതാണ് സ്വയം വിലയിരുത്തൽ .... പിന്നെ , ബാക്കി അവരോടു നിങ്ങൾ ചോദിച്ചാൽ അവരുടെ വേർഷൻ കഥ അറിയാം !!!

6.ഭാരത സ്ത്രീകളുടെ വീട്ടകങ്ങളിലെ പ്രശ്ന ങ്ങൾ സോൾവ് ചെയ്യുന്ന കഴിവ് പ്ലസ് വീട്ടിലെ ഒരാണിന്റെ സപ്പോർട്ട് ഉണ്ടായാൽ ഭാവിയിലെ അതിശയിപ്പിക്കുന്ന ഒളിമ്പിക് താരങ്ങൾ വരെ ഉണ്ടാകുമെന്ന് വിശ്വസിക്കുന്നുണ്ടോ? എന്തൊക്കെയാണ് വീട്ടകങ്ങളിൽ സ്ത്രീകൾ കാണിക്കുന്ന ആ കഴിവുകൾ?

1.  നല്ലൊരു സ്പോർട്സ് മാൻ സിപ്രിട്ടോടു കൂടി , അതിശയിപ്പിക്കുന്ന സമയ പരിധിക്കുള്ളിൽ നിന്നും , വീട്ടിലെ എല്ലാവരുടെയും കാര്യങ്ങൾ നോക്കി കണ്ടു ചെയ്യുകയും , സ്വന്തം കാര്യങ്ങൾ ചെയ്യുകയും , ചെയ്യുന്ന ചാമ്പ്യാൻ മനോഭാവം    ( ഫോർ ഒളിമ്പിക് മെഡൽ )

7.ട്രോൾ ഇറക്കൽ എന്ന് തുടങ്ങി?

ട്രോളുകൾ ആധിനിക കാലത്തെ കാർട്ടൂൺ കലയാണെന്ന് തോന്നിയിട്ടുണ്ട് …. പല മനോഹമരമായ ട്രോളുകളും കണ്ടു ഒരു പാട് ചിരിക്കുകയും അത്ഭുതപ്പെടുകയും ചെയ്തിട്ടുണ്ട് … നമുക്ക് വളരെ പരിചിതമായ സിനിമ സീനുകൾ , സമീപകാലത്തെ സംഭവങ്ങളുമായി കൂട്ടി ചേർത്ത് , അത് താനല്ലയോ ഇത് , എന്ന് എല്ലാരേയും തോന്നിപ്പിക്കുന്ന , പല വലിയ കാര്യങ്ങളും ഒരു ചിത്രത്തിലൂടെ പറയാൻ കഴിയുന്ന , ഒരു നല്ല മാധ്യമമാണ് ട്രോളുകൾ എന്ന് തോന്നിയിട്ടുണ്ട് …. ഇടയ്ക്കു അതോ ഒരു  സംഭവം കേട്ടപ്പോൾ  , എന്റെ മനസ്സിൽ ഒരു സിനിമ സീൻ ഓർമ്മ വന്നപ്പോൾ തുടങ്ങിയതാണ് ട്രോള് ഉണ്ടാക്കൽ … അത് നന്നായെന്ന് ചില കൂട്ടുകാർ പറഞ്ഞപ്പോൾ , പിന്നെയും ഇടയ്ക്കു  അത് പോലെ ഇറക്കാനുള്ള ആവേശമായി ... :)

8.തമാശ വഴങ്ങുമെന്ന് എന്നാണ് തിരിച്ചറിഞ്ഞത്? 

ജീവിതത്തിൽ ഒരു തമാശക്കാരൻ ആണോ? ചുറ്റുമുള്ളവരെ തമാശ പറഞ്ഞു ചിരിപ്പിക്കാറുണ്ടോ?

ചെറുപ്പം മുതൽ , കൂട്ടുകാർക്കിടയിൽ , മിമിക്രി / കൊമേഡി / ബഡായി പറച്ചിൽ / ചളു അടിക്കൽ എന്നിവ ഉണ്ടായിരുന്നു …. ആദ്യം എഴുതിയ ബ്ലോഗുകൾ സീരിയസ് /ബുദ്ധി ജീവി ടൈപ്പ് ആണ് … ഇപ്പോൾ അതൊക്കെ വായിക്കുമ്പോൾ എനിക്ക് കൊമേഡി ആയി തോന്നും ….. മറ്റുള്ളവർ ചിരിച്ചു കാണുമ്പോൾ വല്ലാത്ത സന്തോഷം   ആണ് ; നമ്മൾ ആ ചിരിയുടെ കാരണം ആകുന്നതു മഹാ ഭാഗ്യം ആയും ഞാൻ കാണുന്നു … അങ്ങനെ , തമാശകൾ എന്ന് എനിക്ക് തോന്നിയത് ഞാൻ എഴുതി തുടങ്ങി … !! ചിരിച്ചാൽ സന്തോഷം , അല്ലേൽ , ആകെ കോമേഡിയാകും !!!  :D

9.സ്വന്തം ഭാഷയിൽ താങ്കൾ ചിരിപ്പിക്കുന്ന അതേ കഴിവ് ഇംഗ്ലീഷ് ഭാഷയിലും ഉണ്ടോ?

ഇല്ല …. മലയാളം  മീഡിയത്തിൽ പഠിച്ച എനിക്ക് , ഇപ്പോഴും ഇംഗ്ലീഷിൽ ഒരു പാട് കാര്യങ്ങൾ വഴങ്ങില്ല … !!  അത് കൊണ്ട് ഇംഗ്ലീഷിൽ ഞാൻ സീരിയസ് ആണ്  സംസാരിക്കുമ്പോൾ മറ്റുള്ളവർ ഒരുപാട് ചിരിക്കാറുണ്ട് … പക്ഷെ , അത് വേറെ !!!  

10.ഫേസ്ബുക്കിൽ ട്രെന്റിനൊപ്പം പോസ്റ്റിടുന്ന ആളാണോ താങ്കൾ..അങ്ങനെ ഇടാൻ സാധികാഞ്ഞാൽ വീർപ്പുമുട്ടോ മാനിയ ബാധിക്കാറുണ്ടോ?

ഫേസ്ബുക്കിൽ ട്രെൻഡായി വിഷയങ്ങളിൽ , എന്റെ അഭിപ്രായം പറയാൻ തോന്നാറും , ഇടയ്ക്കു പോസ്റ്റാറും ഉണ്ട് . പക്ഷെ , ഇത് വേറെ അതൊരു വീർപ്പുമുട്ടോ മാനിയ ആയിട്ടില്ല … ചിലപ്പോൾ എനിക്ക് മാക്സിമം പത്തു ഇരുപതു ലൈക്കുകൾ മാത്രമേ കിട്ടാറുള്ളു .. അത് കൊണ്ടാകും വലിയ  ടെൻഷൻ ഇല്ലാത്തതു !!!  :D

11. സർപ്രൈസ് കൾ ഇഷ്ടമുള്ള ഒരാളാണോ?ആണെങ്കിൽ അടുത്ത കാലത്ത് സർപ്രൈസ് ചെയ്തു ഞെട്ടിച്ചത് പറയാമോ? ഇല്ലെങ്കിൽ എന്ത് കൊണ്ട്?

അതെ … എനിക്ക് ജീവിതത്തിൽ സർപ്രൈസുകൾ ( അപ്രതീക്ഷിതമായ നല്ലൊരു അനുഭവം ) വളരെ ഇഷ്ട്ടമാണ് … അത് ചിലപ്പോൾ അപ്രതീക്ഷിതമായ ഒരു സുഹൃത്തിന്റെ മെസ്സേജ് /കോൾ ആകാം ; അല്ലെങ്കിൽ നിനച്ചിരിക്കാതെ വീട്ടിലേക്കു വന്നുകയറിയ ഒരു കുടുംബ സുഹൃത്താകാം …. അടുത്ത കാലത്ത് സർപ്രൈസ് ചെയ്തു ഞെട്ടിച്ചത് , കഴിഞ്ഞ കൊല്ലം എന്റെ ഭാര്യയ്ക്ക് അവളുടെ സുഹൃത്തുക്കളോടൊപ്പം ചേർന്ന് നൽകിയ 'സർപ്രൈസ് ബേബി ഷവർ '  ആണ് … ആ ദിവസം രാവിലെ തന്നെ ഷിപ്പിംഗ് എന്നും പറഞ്ഞു ഞാൻ രാവിലെ എല്ലാരേയും കൂട്ടി ഇറങ്ങി .. ആ സമയം കൊണ്ട് ഞങ്ങളുടെ സുഹൃത്തുക്കൾ ( ഏതാണ്ട് 30 കുടുംബങ്ങൾ ) ഞങ്ങളുടെ വീട്ടിൽ കയറി എല്ലാ ഒരുക്കങ്ങളും നടത്തി , അകത്തു മിണ്ടാതെ ഇരുന്നു … പറഞ്ഞുറപ്പിച്ച സമയം ആയപ്പോൾ , ഞാൻ വീട്ടിൽ ഒരു അത്യാവശ്യ സാധനം മാറാന് വെച്ചെന്നു പറഞ്ഞു , തിരിച്ചു വീട്ടിലെത്തുകയും , ഭാര്യയോട് വയറ്റിൽ തുറന്നു മേശപ്പുറത്തുള്ള സാധനം എടുത്തു കൊണ്ട് വരുവാനും പറഞ്ഞു … അവൾ പോയി വാതിൽ തുറന്നപ്പോൾ , അകത്തു നിന്ന് എല്ലാരും കൂടെ 'സർപ്രൈസ് പാർട്ടി '... !! അതൊരു നല്ല അനുഭവം ആയിരുന്നു എല്ലാർക്കും ... :)

12.ആണ്കുട്ടികൾ ഇല്ലാത്തത് വിഷമം ഉണ്ടാക്കിയിട്ടുണ്ടോ?

ഒരിക്കലുമില്ല …. എനിക്ക് ഒരൊറ്റ അനിയനാണ് , അത് കൊണ്ട് പണ്ട് മുതലേ ഒരു സഹോദരി ഇല്ലെന്ന സങ്കടം ഉണ്ടായിരുന്നു … എനിക്ക് പെണ്കുട്ടികള് വേണമെന്നായിരുന്നു ആഗ്രഹം … അത് കൊണ്ട് മൂന്നു മിടുക്കി സുന്ദരി പെൺകിക്കുട്ടികൾ എന്നത് എനിക്ക് ഒരുപാട് സന്തോഷം ആണ് …  :)

13.ജീവിതത്തിൽ നിന്ന് പഠിച്ച, എന്നാൽ പാലിക്കാൻ ബുദ്ധിമുട്ടുന്ന രണ്ട് പാഠങ്ങൾ പറയാമോ?

1. " നമ്മൾ  മറ്റുള്ളവരെ നമ്മുടെ ഭാഗം മനസ്സിലാക്കിപ്പിക്കാൻ  ശ്രമിക്കുന്നതിനു പകരം , ആദ്യം മറ്റുള്ളവരെ നമ്മൾ മനസ്സിലാക്കാൻ ശ്രമിക്കുക , "

2. " ഏറ്റവും പ്രധാനമായത് , ആദ്യം തന്നെ ചെയ്യുക .. ", ഉദാഹരണത്തിന് ദിവസേനയുള്ള വ്യായാമം . മറ്റുള്ള ജീവിത തിരക്കിൽ പ്രധാനമായ , എന്നാൽ വേറെ ആരും നിര്ബന്ധിക്കാനില്ലാത്ത ഇതുപോലെയുള്ള കാര്യങ്ങൾ നമ്മൾ ചെയ്യണം 

:)

14.മുഴുക് തിരി കത്തിക്കാൻ പറഞ്ഞാൽ സ്വന്തം വീട് കത്തിക്കുന്ന പന്തം കൊളുത്തി പ്രകടനം നടത്തുന്ന ഇന്ത്യക്കാർക്ക് അപകടം വരുത്താതെ ഹെൽത്ത് വർക്കേഴ്സിനെ ബഹുമാനിക്കാൻ ഒരു വഴി നമ്മുടെ പി എം ന് ഉപദേശിക്കാൻ ഒരവസരം കിട്ടിയാൽ എന്ത് പറയും?

ട്രാഫിക് സിനിമയിലെ ജോസ് പ്രകാശിന്റെ ശബ്ദത്തിൽ ഞാൻ പറയും … " അളിയാ  പി.എം … ജീവിതത്തിൽ മുഴുവൻ ഇമ്മാതിരി ഉടായിപ്പു പരിപാടി കാണിച്ചു പറ്റിക്കാതെ , ഒരു പ്രാവശ്യം , ഒരൊറ്റ പ്രാവശ്യം , നമ്മുടെ ഹെൽത്ത് വർക്കേഴ്സിനെ സഹായിക്കുന്ന എന്തെങ്കിലും സാമ്പത്തിക പദ്ധതി , ഉദാഹരണത്തിന് ഹെൽത്ത് വർക്കേഴ്സിസിന്റെ മിനിമം സാലറി ഉയർത്തുക , പെൻഷൻ/ ഇൻഷുറൻസ്  പോലുള്ള പദ്ധതികൾ തുടങ്ങുക , താങ്കൾ കൊണ്ടുവന്നാൽ ; ഇത് വേറെ ചെയ്ത മണ്ടത്തരങ്ങൾക്കു ഒരു പ്രായശ്ചിത്തം ആകും ; ഇല്ലേൽ … പ്രത്യേകിച്ച്  ഈ ചീത്ത  പേരിനു ഒന്നും സംഭവിക്കില്ല …"

15. ഇത്തരം ആഹ്വാനങ്ങൾ പൊളിറ്റിക്കൽ ഗിമ്മിക്ക് ആയി തോന്നിയിട്ടുണ്ടോ?

അതെ .. ഇത്തരം പല കാര്യങ്ങളും , വലിയ കോർപ്പേറേറ് മാർക്കറ്റിംഗ് / PR കമ്പനികളുടെ തന്ത്രങ്ങളായി എനിക്ക് തോന്നിയിട്ടുണ്ട് !!

16.ദൈവ വിശ്വാസി ആണോ?

വിശ്വാസം , അതല്ലേ എല്ലാം !! മനുഷ്യനേക്കാൾ ഒരു വലിയ ശക്തി ഇല്ല എന്ന് വിശ്വസിക്കുന്നതിനേക്കാൾ , ഒരു വലിയ ശക്തി എവിടെയോ ഉണ്ടെന്നു വിശ്വസിക്കാൻ എനിക്ക് ആഗ്രഹമുണ്ട് … പക്ഷെ , അത് നമ്മളിൽ പലരും കരുതും പോലെയുള്ള  ഉടായിപ്പു ഒരാളല്ല സാർ ...

17. അടച്ചിട്ട അമ്പലങ്ങൾ പള്ളികൾ .. അതിനകത്ത് ഇരിക്കുന്ന ഏകരായി പോയ, തിരക്കില്ലാതെ മടുത്തിരിക്കുന്ന ദൈവങ്ങൾ ഇപ്പോൾ എന്തായിരിക്കും ചിന്തിക്കുന്നത് എന്നാലോചിച്ചിട്ടുണ്ടോ?

18.താങ്കൾ താങ്കളോട് തന്നെ ചോദിച്ചിട്ട് ഉത്തരം കിട്ടാതെ പോയ ചോദ്യം എന്താണ്?

19. ഇരക്കൊപ്പം നിൽക്കുകയും പ്രതിക്ക് വേണ്ടി പ്രാർത്ഥിക്കുകയും ചെയ്യുന്നവർ പ്രതിയേക്കാൾ ഭീകരർ ആണോ? എന്തായിരിക്കും ആ മനോഭാവത്തിന് പിന്നിൽ?

ഇരക്കൊപ്പം നിൽക്കുകയും പ്രതിക്ക് വേണ്ടി പ്രാർത്ഥിക്കുകയും ചെയ്യുന്നവർ, ഭീകരർ എന്നതിനേക്കാൾ ഗത്കെട്ടവർ എന്നാണ് എനിക്ക് തോന്നിയിട്ടുള്ളത്. ആ മനോഭാവത്തിന് പിന്നിൽ ഏതേലും മാനസ്സിക രോഗം/ അവസ്ഥ ആയിരിക്കണം.... !!

20.ജീവിതത്തിൽ കിട്ടിയ ഏറ്റവും വലിയ കോംപ്ലിമെന്റ് എന്താണ്?

ഈ പോസ്റ്റിൽ ഞാൻ പറഞ്ഞ അനുഭവത്തിൽ,അദ്ദേഹം പറഞ്ഞ “ I should say that you are the only one person in my life who gave me money with a nice smile on happy face. I feel some happiness while holding your money. “ വരികളാണ് എനിക്ക് കിട്ടിയ വലിയ അവാർഡ്... 

http://shaheemayikar.blogspot.com/2015/10/blog-post.html?m=1

Aarsha :

ഷഹീമിനോട് ഞാൻ എന്ത് ചോദിക്കും !!

അത് ശരിയാണല്ലോ !! എന്നെ പറ്റി എന്തേലും അറിയാഞ്ഞുണ്ടെങ്കിൽ, അത് അഭിലാഷിനോട് നേരിട്ട് ചോദിച്ചറിഞ്ഞാൽ മതി....

കിട്ടിപ്പോയി.

 1. അഭിലാഷിനെ കുറിച്ച് താങ്കൾക്കുള്ള അഭിപ്രായം - രണ്ടു വാചകത്തിൽ കുറയാതെ എഴുതുക ?    

ഓണം, വിഷു, ഈസ്റ്റർ, ദീപാവലി, ക്രിസ്മസ്, റംസാൻ, ന്യു ഇയർ ആഘോഷങ്ങൾ ഏതുമാവട്ടേ ; അഭിലാഷ് ആർഷയ്ക്ക് ഒരുത്തമ സമ്മാനമാവമാണ്....

Utopian :

@⁨Shaheem Ayikar⁩ ബ്ലോഗ്‌സാപ്പ് ന്റെ  വീഡിയോ ഉണ്ടാക്കിയത് കണ്ടിട്ട് കൊച്ചു പയ്യനാ എന്ന് കരുതിയ ഞാൻ പ്ലിങ്.. 🤭

ഷഹീമിക്കാ, ചർമ്മം കണ്ടാൽ പ്രായം തോന്നില്ല / ഇപ്പോഴും കുട്ടിത്തം മനസ്സിൽ സൂക്ഷിക്കുന്ന ഒരാളാണ് താങ്കൾ  എന്ന് പറഞ്ഞാൽ ശരിയാണോ?

വളരെ , വളരെ ശരിയാണ് ... പക്ഷെ , അതിനെ കുടുംബത്തിലെ ചില 'പ്രമുഖ' അസൂയാലുക്കൾ 'ജീവിതത്തിൽ വലിയ ഉത്തരവാദിത്യമില്ലാതെ നടക്കുന്നവൻ ' എന്ന് അടക്കം പറഞ്ഞതായി ചില ആക്ഷേപങ്ങളുണ്ട് ....  

@⁨Shaheem Ayikar⁩ ഡെന്റിസ്റ്റ് ഭാര്യയുടെ ഭർത്താവ് എന്ന നിലയിൽ എന്തൊക്കെയാണ് ജീവിതാനുഭവങ്ങൾ?

ഈ ചോദ്യം ഷമിയോട് ചോയിച്ചിരുന്നേൽ കൊട്ടക്കണക്കിനു മറുപടി കിട്ടിയേനെ

അതെ, അതെ ... ഇവിടെ ഒരു ലോഡ് മറുപടി വീണേനെ !!!!  :D

കല്യാണം കഴിഞ്ഞപ്പോൾ അവളോട് എന്നോട് ആദ്യം പറഞ്ഞത് , "ഇക്കായുടെ മുന്നിലുള്ള രണ്ടു പല്ലു ക്ലാസ്സ് 2, ഡി 2 ആണ് " എന്നാണ് !!! ഞാൻ ആകെ നാണിച്ചു പോയി , പിന്നെയാ മനസ്സിലായത് അത് കോമ്പല്ലു എന്നതിന്റെ ശാസ്ത്രീയ നാമം ആണെന്ന് !! ഇപ്പോൾ  ഒരു സന്തുഷ്ട്ടപരമായ കുടുംബജീവിതത്തിൽ 'പല്ലിനുള്ള' സ്ഥാനം എനിക്ക് പിടികിട്ടി !! അതായത് , അടങ്ങി ഒതുങ്ങി ജീവിച്ചില്ലേൽ , ചിലപ്പോൾ അവള് പല്ലു അടിച്ചു കൊഴിക്കാം എന്ന് !!!

കണ്ണൂർ ജില്ലയിൽ നിന്നും കൊല്ലത്ത് എത്തിപ്പെട്ടത് എങ്ങനെ? 

കല്യാണിയെന്നും 

ദാക്ഷായണിയെന്നും പേരായ രണ്ട് സ്ത്രീകളുടെ കത 

വായിച്ചോ? 

ഇങ്ങനെ തെക്കും വടക്കും ആയി പറിച്ചു നടൽ ജീവിതത്തെ എങ്ങനെയൊക്കെ ബാധിച്ചു?

പൊതുവെ പരുക്കനും , കർക്കശ കാരനും , സർക്കാർ ഉദ്യോഗസ്‌ത്‌നുമായ എന്റെ ബാപ്പാജിക്കു  , അടിക്കടി കേരളത്തിന്റെ മുക്കിലും മൂലയിലേക്കും ഉണ്ടാകുന്ന ട്രാൻസ്ഫെറുകളുടെ ഇടയിൽ , കുട്ടികളായ ഞങ്ങളുടെ പഠിത്തം ഒരു സ്കൂളിൽ തന്നെ തുടരട്ടെ എന്ന പേരും പറഞ്ഞാണ്  , എന്റെ മാതാശ്രീ ബാപ്പാനോട് , കൊല്ലത്തുള്ള അമ്മയുടെ തറവാടിന് ചേർന്ന് തന്നെ വീട് വെച്ച് കൊല്ലത്തു സ്ഥിര താമസം ആക്കാൻ സജ്ജെസ്റ് ചെയ്തത് ... അങ്ങനെ ഞാൻ ആറാം ക്ലാസ്സു മുതൽ കൊല്ലം ജില്ലയിലേക്ക് പറച്ചി നടപ്പെട്ടു .... ആ പ്രായത്തിൽ ഭാഷയിലും ദേശത്തിലും വേഷത്തിലുള്ള മാറ്റം വലുതായിരുന്നു ..... 'അയ്മ്പതു പിസ ', 'ഓൻ', 'ഓൾ ', 'ആടെ ', 'ഈടെ', എന്നതിന്റെ പേരിലൊക്കെ സ്കൂളിൽ ഒരുപാട് കളിയാക്കൽ കിട്ടിയിട്ടുണ്ട് .... അതൊക്കെ ജീവിതത്തിൽ എങ്ങനെ ഒരു സാഹചര്യത്തിൽ നിന്നും മറ്റൊരു സാഹചര്യത്തിലേക്ക് മാറാം എന്നതിന്റെ നല്ല പഠിപ്പുകളായിരുന്നു ....

ഒരുപാട് പരന്ന വായന എനിക്കില്ല . അത് കൊണ്ട് തന്നെ ആ കഥ വായിച്ചിട്ടില്ല ... പിന്നെ , ഒരു തമാശയ്ക്കു പറയുക ആണെങ്കിൽ , ഭായിയുടെ കൂട്ടുകാരെ ( കല്യാണിയെയും 

ദാക്ഷായണിയെയും  )  എനിക്കും അറിയില്ല , എന്റെ കൂട്ടുകാരെ ഭായിക്കും അറിയില്ല ... 

 

🤭🏾

Fyi,  കല്ല്യാണിയുടെയും ദാക്ഷായണിയുടെയും കത എന്ന  ആർ രാജശ്രീ യുടെ നോവൽ ..  ഇതുപോലെ വടക്ക് നിന്ന് തെക്കോട്ടും  അവനവന്റെ വീട്ടിൽ നിന്ന് ഭർത്താവ് ന്റെ വീട്ടിലേക്കും പറിച്ചു നടപ്പെടുന്ന സ്ത്രീകൾ ടെ ജീവിതസമരങ്ങൾ ടെ കഥ ആണ്. 

Very good novel. 

You should read it. 🏽🥰

തീർച്ചയായും ഭായ് .... അടുത്ത അവസരം കിട്ടുമ്പോൾ ഞാൻ ഈ കഥ വായിച്ചു ഭായിയെ എന്റെ അഭിപ്രായം അറിയിച്ചിരിക്കും ...

Sari Chechi :

ഇപ്പോൾ പ്രോപ്പർ കൊല്ലം കാരൻ ആയോ..

ഞാൻ കൊല്ലത്തിന്റെ മരുമഹൾ ആണ്

അതെയോ !! ശാരി ചേച്ചി കൊല്ലത്തു എവിടെയാണ് ....? എന്റെ വീട് ഇരവിപുരം പള്ളിമുക്ക് എന്ന് പറയുന്ന സ്ഥലത്താണ് ... അതെ , ഇപ്പോൾ  ഞാൻ എല്ലാരോടും കൊല്ലം കാരൻ എന്നാണ് പറയാറ് ....

എനിക്ക് കൊല്ലത്തെ കുറിച്ച് ഏറെ ഒന്നും അറിയില്ല. 

കൂട്ടുകാരൻ കരുനാഗപ്പള്ളി കാരൻ ആണ്.

അവനാകട്ടെ 18 മത്തെ വയസ്സിൽ പാലക്കാട്‌ ക്ക് പോന്നിരുന്നു. ആകെ അറിയാവുന്നത് ശാസ്താംകോട്ട ദേവസ്വം ബോർഡ് കോളേജിൽ പോയിട്ടുണ്ട്. അവൻ അവിടെ ആയിരുന്നു പി ഡി സി ചെയ്തത്. 

അവരുടെ വീട്ടിലേക്ക് വഴി തെറ്റാതെ ചെന്നെത്തും എന്ന ഒറ്റ അച്ചീവ്മെന്റ് ആണ് കൊല്ലത്ത് എനിക്കുള്ളത്🤭

അത് കൊള്ളാം ... വീട്ടിലേക്ക് വഴി തെറ്റാതെ ചെന്നെത്തും എന്നത് വലിയ  അച്ചീവ്മെന്റ് തന്നെയാണ് ....

Aarsha :

2.  മറക്കാൻ കഴിയാത്ത ഒരു അബദ്ധം?

ഒന്നോ !!! എന്റെ പോസ്റ്റുകളിൽ പലതും എന്റെ അബദ്ധങ്ങൾ ആണ് !!! SSM&T ( ശ്രീനാരായണ സ്കൂൾ ഓഫ് മാനേജ്‌മന്റ് & ടെക്നോളജി ) എന്നതിന് പകരം 'ഷഹീം സ്കൂൾ ഓഫ് മണ്ടത്തരം ആൻഡ് തെണ്ടിത്തരം ' എന്നൊരു നിർവചനം വേറെ ഉണ്ടായിരുന്നു എന്റെ കോളേജിൽ എനിക്ക് ... എങ്കിലും , മറക്കാനാവാത്ത ഒരു അബദ്ധം ഈ പോസ്റ്റിലുണ്ട് ..... http://nicestories4u.blogspot.com/2015/09/blog-post_25.html

ithenikk ariyam. Postaatthath parayanam  Mistar

അതെന്നാ പരിപാടിയാണ് മാഡം ... പണ്ട് ഞാൻ പോസ്റ്റായ അനുഭവങ്ങളൊക്കെ പോസ്റ്റായി , ഇതിപ്പോൾ ഇതുവരെ എഴുതാത്ത അനുഭവം ഞാൻ എവിടെന്നിടുത്തു തരാനാണ് .... !! െ

Sari Chechi:

21 @⁨Shaheem Ayikar⁩  ഈ കാർട്ടൂണിസ്റ്റിനെ ശ്രദ്ധിക്കാറുണ്ടോ?🏽

വളരെ നല്ല കാർട്ടൂൺ ... ഇതിനു മുൻപും ഇദ്ദേഹത്തിന്റെ കാർട്ടൂൺ ആരൊക്കെയോ ഫോർവേഡ് ചെയ്തു കണ്ടിട്ടുണ്ടെന്ന് തോന്നുന്നു ... ഇനിമുതൽ ശ്രദ്ധിക്കാം ... :)

22 മുപ്പതുവർഷം കഴിഞ്ഞ്

കണ്ടുമുട്ടിയാലും

പുരുഷന് തന്റെ

ആദ്യകാമുകിയെ

തിരിച്ചറിയാനാവും.

ഏറെ പുതുക്കിപ്പണിതിട്ടും

താൻ പണ്ടു പാർത്തിരുന്ന

ഗ്രാമത്തിലെ വീട് തിരിച്ചറിയും

പോലെ. മ്മടെ സച്ചിദാനന്ദ കവി എഴുതിയതാണ്..

മുൻകാല കാമുകിയെ അടുത്തെങ്ങാനും തിരിച്ചറിഞ്ഞീനാ?

മുൻകാല കാമുകിയെ അടുത്തെങ്ങാനും തിരിച്ചറിയാൻ , അവളെ ഇടയ്ക്കെങ്ങാനും മറന്നിട്ടു വേണ്ടേ .... !!  

മണ്ടൻ.. മറക്കലും തിരിച്ചറിയലും രണ്ടാണ്

ആണോ ! ആണല്ലേ !!

23. ആദ്യ പ്രണയനുഭവം പങ്കു വെക്കാമോ..

തേപ്പ് കിട്ടിയിട്ടുണ്ടോ

ആദ്യ പ്രണയം പ്രീഡിഗ്രി പഠിക്കുമ്പോൾ ആണ് ...പ്രേമത്തിലെ ജോർജിന്റെയും മേരിയുടെയും പോലെ ഒരു ടീനേജ് പ്രണയം !! ഗൾഫുകാരന്റെ ഒറ്റ മോളാണെന്നു  കരുതി , രണ്ടു മാസം  ബാക്കിൽ നടന്നു വലച്ച സുന്ദരി ഉമ്മിച്ചി പെണ്ണ് , ലൈൻ ആയ    ശേഷം പട്ടാളക്കാരന്റെ മകളായിരുന്നെന്നു തിരിച്ചറിഞ്ഞു ഞെട്ടി തെറിച്ച എന്റെ കൗമാരം !!!! പക്ഷെ , ആ ദിവ്യപ്രണയത്തിനു വലിയ ആയുസ്സു ഉണ്ടായില്ല ... ഏതാണ്ട് പ്രീഡിഗ്രി തീരാറായപ്പോൾ ലൈൻ ആയി ; അപ്പോഴേക്കും ക്ലാസ്സ് തീർന്നു ; ഡിഗ്രിക്ക് അവൾ കോളേജിൽ വന്നില്ല ; അന്വേഷിച്ചപ്പോൾ അവളെ പതിനെട്ടു വയസ്സിൽ തന്നെ വീട്ടുകാര് കെട്ടിച്ചു വിട്ടെന്ന് കേട്ട് !!! അന്ന് അവശകാമുകനായി താടി പോലും വളരാത്തതു കാരണം താടി വളർത്താനാവാത്ത എന്റെ സങ്കടം !! ഇത് തന്നെയായിരുന്നു ആദ്യ തേപ്പും !!!! എന്തായാലും , കോളേജിൽ വെച്ച് രണ്ടാമത്തെ കാമുകിയെ കണ്ടതോടെ ഞാൻ അതു മറന്നു !!!!  

🤭🤪

കടുക്കൻ  ഇട്ടത് പോയാൽ  കമ്മലിട്ടത് വരും ന്നോ മറ്റോ അല്ലേ 🤪🤭 . 

അതോ തിരിച്ചോ?

ഇൻ ഹരിഹർ സിനിമയിൽ ജഗദീഷ് പറയുന്നപോലെ , ഇട്ടത് പോയിട്ട് പിന്നെ  കടുക്കൻ  ആണോ ,  കമ്മലാണോ എന്നൊക്കെ സംശയിച്ചിട്ടു വല്ല കാര്യവും ഉണ്ടോ ഭായി .... !!!

Rajeswari:

@⁨Shaheem Ayikar⁩ 

1) പുസ്തകങ്ങളും സിനിമയും പറഞ്ഞു വയ്ക്കുന്നതിൽ നിന്നും വിഭിന്നമായി പ്രണയം ഒരു over rated emotion ആണെന്ന് പറഞ്ഞാൽ, യോജിക്കുമോ, വിയോജിക്കുമോ?

തീർച്ചയായും യോജിക്കും .... പ്രണയം പലപ്പോഴും കഥകളിലും സിനിമകളിലും ഓവർ റേറ്റഡ് ആണ് .... ഉദാഹരണത്തിന് " എരിയുന്ന പേരു വെയിലത്ത് ഒരില തണലിന്റെ അഭയമാണ് പ്രണയം ' എന്ന് കാവ്യാത്മകമായി എഴുതും . പക്ഷെ , കവി ശരിക്കും ഉദ്ദേശിക്കുന്നത് " ഈ തൊല്ല പിടിച്ച ജീവിതത്തിൽ ഒരു ചെറു സമാധാനം  ആണ് കാമുകി ' എന്നാകാം !!!

2)@⁨Shaheem Ayikar⁩  പ്രതിഭ, കഠിനാധ്വാനം, അവസരങ്ങൾ - ഇതിൽ ഏതാണ് ഒരാളുടെ ഭാവി കൂടുതലും  നിർണയിക്കുന്നത്?

കഠിനാധ്വാനം,..... കാരണം , നമ്മൾ കഠിനാദ്ധ്വാനം ചെയ്യുമ്പോൾ ഒരാളുടെ പ്രതിഭ, തെളിയിക്കുവാനുള്ള കൂടുതൽ അവസരങ്ങൾ ഉണ്ടാവുകയും ,  - അങ്ങനെ  ഒരാളുടെ ഭാവി കൂടുതൽ നല്ലതാവുകയും ചെയ്യുന്നു എന്ന് ഞാൻ വിശ്വസിക്കുന്നു ..... പിന്നെ ., പണ്ടത്തെ ത്രീ റോസ്സ് പരസ്യം  പോലെ " പ്രതിഭ, കഠിനാധ്വാനം, അവസരങ്ങൾ', ഈ മൂന്നു ഗുണവും എനിക്കില്ല "..... !!!

Three roses കുറേക്കാലം കൂടി ഓർത്തു..

കഠിനാധ്വാനം + അവസരങ്ങൾ എന്നാണ് എന്റെ അഭിപ്രായം. 

അവസരങ്ങൾ ലഭ്യമാകുന്നത് അനുസരിച്ചു, ആളുകൾ അവിശ്വസനീയമാം വിധം പരിശ്രമ ശാലികൾ ആവുന്നതും ആഗ്രഹിക്കുന്ന ഇടങ്ങളിൽ എത്തിച്ചേരുന്നതും കാണാറുണ്ട്...

വളരെ നല്ല നിരീക്ഷണം...

Sari Chechi:

24. തള്ളുകൾ നടത്തി സ്വന്തം ജീവിതത്തിൽ റാഡിക്കൽ ആയ വല്ല മാറ്റവും അതു കൊണ്ട് ഉണ്ടാക്കിയിട്ടുണ്ടോ🤭

ഉണ്ട് ....  എന്റെ വർക്ക് ഏരിയ ആയ , ഐ.ടി ഫീൽഡിൽ  തള്ളുകൾക്കു വളരെ പ്രാധാന്യം ഉണ്ട് ... അത് കൊണ്ട് ഒരു മയത്തിലുള്ള തള്ളുകൾ ജീവിതത്തിലും കരിയറിലും ചെറുതായി സഹായിച്ചിട്ടുണ്ട് .....  

25.ഉറക്കം പാതി മരണമാണ്.

ഉയിർത്ത് എഴുന്നേക്കുമ്പോൾ എന്താണ് ദിവസേന കണി കാണാൻ കൊതിക്കുന്നത്?

അതെ , ഓരോ ഉറക്കവും ഒരു മരണമാണെന്ന് ഞാൻ വിശ്വസിക്കുന്നു .... ഓരോ പകലും ഉയിർത്ത് എഴുന്നേക്കുമ്പോൾ , ദിവസേന ഞാൻ കണി കാണാൻ കൊതിക്കുന്നത്, ഞാൻ സ്നേഹിക്കുന്നവരുടെ പുഞ്ചിരിക്കുന്ന മുഖങ്ങളാണ് ..... :)

26. ഖുർആൻ ലെ ഏറ്റവും മനോഹരമായി തോന്നിയ വരികൾ ഏതാണ്?

ഖുർആനിലെ ഒരു ആയത്തിൽ ഒരു വചനമുണ്ട് .... "നിനക്ക് നിന്റെ മതം , എനിക്ക് എന്റെ മതം " എന്ന് ... അതായത് നിനക്ക് നീ വിശ്വസിക്കുന്നതിലും , എനിക്ക് ഞാൻ വിശ്വസിക്കുന്നതിലും തുടരാനുള്ള അവകാശം ..... എനിക്ക് ഈ സ്വാതന്ത്രം വളരെ ഇഷ്ട്ടമാണ് ....

27. പി ഡി സി ചെയ്ത  ആളാണല്ലേ? ലാസ്റ്റ് ബാച്ച് ആയിരുന്നോ?

അതെ .. കൊല്ലം S.N കോളേജിൽ ആയിരുന്നു പ്രീ-ഡിഗ്രി ....ലാസ്‌റ് ബാച്ച് അല്ല .... കാരണം , ഞാൻ ഡിഗ്രി ഫൈനൽ ഇയർ പഠിക്കുമ്പോഴും കോളേജിൽ പ്രീ ഡിഗ്രി പിള്ളേർ ഉണ്ടായിരുന്നു ....

Divya :

ചിലതൊക്കെ വായിച്ചു . ഇന്ന് ചിരിച്ചു ചാവാനുള്ള ദിവസം ആണെന്ന് തോന്നുന്നു

തുരു തുരെയുള്ള കിടിലം ചോദ്യങ്ങളുടെ ആക്രമണത്തിൽ , ഞാൻ തട്ടിപോകുമോ എന്ന ഭയത്തിലാണ് ഞാൻ  !!!!

Rajeswari:

@⁨Shaheem Ayikar⁩

 3) ബഷീറിനെ വായിച്ചിട്ടുണ്ടോ?  അദ്ദേഹത്തിന്റെ ലോക ദർശനത്തെ പറ്റി പറയാമോ?  ഇഷ്ട കൃതിയും കഥാപാത്രവും കൂടി.

സത്യം പറയാലോ .. ഞാൻ ബഷീർ കൃതികൾ വായിച്ചിട്ടില്ല ... എങ്കിലും നാടൻ കഥാപാത്രങ്ങളുടെ ഭാഷയിൽ മണ്ണിന്റെ മണമുള്ള കഥകൾ രസകരമായി പറഞ്ഞ ബഷീറിനെ ഒരുപാട് ബഹുമാനമാണ് . ... "ലോകത്ത് യുദ്ധം ഇല്ലാതാവണമെങ്കിൽ ,സ്ത്രീ പുരുഷ ജാതി മത ഭേതമന്യേ സർവർക്കും പരമ രസികൻ വരട്ടു ചൊറി വരണം .ചൊറിയുന്നിടത്ത് മാന്തുന്നതിനേക്കാൾ സമാധാനപൂർണ്ണമായ ഒരാനന്ദവും ലോകത്ത് വേറെയില്ല". എന്നദ്ദേഹം പറഞ്ഞത് ഈ കൊറോണക്കാലത്തു നമ്മൾ സത്യമായെന്നു മനസ്സിലാക്കിയില്ലേ !!!!

പറ്റിയാൽ വായിക്കാൻ നോക്കൂ. നഷ്ടം ആവില്ല

Sari Chechi:

28. നല്ല കഠിനാധ്വാനികൾ പ്രിവിലേജ് ഇല്ലാത്തത് കൊണ്ട് അവസരങ്ങൾ കുറഞ്ഞു പോകും എന്ന് തോന്നിയിട്ടുണ്ടോ?

കുറച്ചൊക്കെ ശരിയാണെന്നു തോന്നിയിട്ടുണ്ട് ... പ്രിവിലേജ് ഇല്ലാത്തത് കൊണ്ട് അവസരങ്ങൾ കുറഞ്ഞു പോകാം ; പക്ഷെ , ഉള്ളിലെ തീയ് അണയാതിരുന്നാൽ , വീണു കിട്ടുന്ന കുറഞ്ഞ അവസരങ്ങളിൽ നിന്നും പ്രിവിലേജ് ഇല്ലാത്ത കഠിനാധ്വാനികൾക്ക് അന്തിമ വിജയം സാധ്യമാണെന്നതാണ് പരമ സത്യം .....

KD:

1. ഷഹീം ഭായ്, 

താഴെ പറയുന്നവരെ നേരിൽ കാണുമ്പോൾ അവരവരുടെ സ്വഭാവഗുണത്തിനനുസരിച്ചു എന്ത് ഭക്ഷണം വാങ്ങിക്കൊടുക്കും?!

1. മുരളി ചേട്ടൻ  

2. കല്ലോലിനി 

3. ആർഷ ചേച്ചി 

4. ഉട്ടോപ്പിയൻ 

5. ആനന്ദ് ശ്രീധരം 

6. വിനുവേട്ടൻ 

ഉദാഹരണം: 

കൊച്ചു ഗോവിന്ദൻ - പാൽപ്പായസം

അയ്യടാ നേരിട്ട് കാണുമ്പോൾ പാൽപായസം കിട്ടാനുള്ള മൂവ്

അതൊരു വല്ലാത്ത കുഴപ്പിക്കുന്ന ചോദ്യം ആണല്ലോ കെ.ഡി ഭായ് .. !! ഇവരുടെ പേരു കേട്ടപ്പോൾ ആദ്യം എന്റെ മനസ്സിൽ എത്തിയ ഭക്ഷണത്തിന്റെ പേരു വേണേൽ പറയാം .... 

1. മുരളി ചേട്ടൻ - പൊരിച്ച കോഴിയും ചപ്പാത്തിയും 

2. കല്ലോലിനി - പൊരിച്ചമീനും ചോറും 

3. ആർഷ ചേച്ചി - ബീഫും പൊറോട്ടയും 

4. ഉട്ടോപ്പിയൻ - ചിക്കൻ ബർഗർ 

5. ആനന്ദ് ശ്രീധരം - നെയ്‌റോസ്റ്റും ഉഴുന്ന് വടയും 

6. വിനുവേട്ടൻ - മലബാർ ബിരിയാണി 

7. കൊച്ചു ഗോവിന്ദൻ - ബോണ്ട

Sari Chechi:

Kedik angane thanne venam. Bondaaaaaa

Only മത്തി

Vinu vettan:

മലബാർ ബിരിയാണി... താങ്ക്യൂ താങ്ക്യൂ...

Utopian:

എനിക്ക് അൽ ഫഹാം മാത്രമേ ഇറങ്ങൂ ന്ന് അറിയില്ലേ കുട്ടിക്ക്. 

I dont like burger. 🤮

KD:

ബർഗറും ബോണ്ടയുമായി ഒരു എക്സ്ചേഞ്ചിനു താല്പര്യം ഉണ്ടോ?!

Utopian:

മസാല ബോണ്ട ആണെങ്കിൽ 🤝🏾🏽

@⁨Shaheem Ayikar⁩ Note the point!

Aarsha:

Thankoooo ഷഹീമേ താങ്കൂ... 🥰

കൂട്ടത്തിൽ പറയട്ടെ ബാക്കിയുള്ളവർക്ക് വേണ്ടി -  എന്റെ ദിച്ചൻ വയറ്റിലുള്ളപ്പോൾ എനിക്ക്  അങ്ങ് ദൂരത്ത് LA യിൽ നിന്നും ഒരു ബോക്സ്‌ നിറയെ ബീഫ് വരട്ടിയത് അയച്ചവരാണ് ഷഹീമും ഷമിയും 🥰 ഒറ്റയ്ക്കു വെച്ചുണ്ടിരുന്ന ഗര്ഭകാലത്തിലെ അപൂർവമായ രുചിയോർമ്മകൾ

Shaheem:

ദാണ്ടെ , ദാണ്ടെ .... "നൂറുദിന രുചിയോർമ്മകളിലെ ' ഒരു ലക്കം ആർഷയ്ക്കു ഒത്തു കിട്ടി !!!

Aarsha:

അതൊക്കെ ആൾറെഡി ലിസ്റ്റിൽ ഉള്ളതാ

Sari Chechi:

29 @⁨Shaheem Ayikar⁩   ജീവിതത്തിലെ ആദ്യ സെലിബ്രിറ്റി ക്രഷ് ആരായിരുന്നു..

സെലിബ്രിറ്റി അല്ലാത്ത ഇപ്പോൾ ക്രഷ് ഉള്ള ഒരാൾ?

കാജൽ .... എന്റെ കോളേജ് കാലത്തു കാജലിന്റെ ഏതു പാട്ടും സിനിമയും വല്ലാത്ത ഒരു സന്തോഷം ആയിരുന്നു ...ഇപ്പോൾ എനിക്ക്  ക്രഷ് തോന്നാറില്ല എന്നൊന്നും കള്ളം പറയുന്നില്ല , സെലിബ്രിറ്റി അല്ലാത്തതു കൊണ്ട് പേരു പറഞ്ഞാൽ നിങ്ങൾക്കറിയില്ല , അത് കൊണ്ട് ഞാൻ പേരു പറയുന്നില്ല ... !!

Utopian:

എനിക്ക് നാൻ മഹാൻ അല്ല  സിൽമയിലെ  "ഇരഗൈപോലേ " പാട്ട്.. 🥰🥰🥰

Sari Chechi:

30 എനിക്ക് ഒരു പാട്ട് ഡെഡിക്കേറ്റ് ചെയ്യാൻ പറഞ്ഞാൽ ഏത് പാട്ട് ഡെഡിക്കേറ്റും @⁨Shaheem Ayikar⁩

".മന്ത്രി കൊച്ചമ്മ വരുന്നുണ്ടേ ...ആർപ്പോ , ഗിർറോആർപ്പോ ഇർ റോ

മന്ത്രിക്കൊച്ചമ്മ വരുന്നുണ്ടേ 

ആർപ്പോ ഇർ റോ

കൈകൊട്ടിപ്പാടാം  വരവേറ്റീടാം വരവെതീരേറ്റീടാം...

....

വക്കീലന്മാരല്ലേ ഞങ്ങൾ

വക്കാലത്തേകൂല്ലേ പിന്നെ

അച്ചാരം തന്നാപ്പോരേ വാദിക്കൂലേ.... "

Sari Chechi:

31. സൗത്ത് ഇന്ത്യൻ സൂപ്പർ സ്റ്ററുകളിൽ ഒരാളെ വെച്ച് സഖാവ് ഈശോപ്പൻ ന്റെ പടം എടുക്കണം .. ആരെ സജസ്റ്റ് ചെയ്യും?

ഈശോപ്പൻ ആരാണെന്നു പിടികിട്ടിയില്ല ... എനിക്കിലും , നല്ല പടം ആണെങ്കിൽ സൂപ്പർ സ്റ്ററുകളിൽ മമ്മൂട്ടിക്ക് അവസരം കൊടുത്തോളു ... ഇല്ലേൽ , ഇക്ക ഏതേലും ചവറു പടത്തിൽ കൊണ്ട് തലയിടും !!

ജീസസ് ക്രൈസ്റ്റ്

ഓ !! ഈശോ മിഷിയായ്ക്കു സ്തുതി ആയിരിക്കട്ടെ ~~~

KD:

ജീസസ് ക്രൈസ്റ്റിനെ കണ്ടാൽ യേശുവേട്ടൻ എന്ന് വിളിക്കുന്ന ടീമാ മലയാളികളെന്ന് പ്രാഞ്ചിയേട്ടൻ പറഞ്ഞത് മറന്നു ല്ലേ?!

ഓ !! എന്റെ ഭാഗത്തും തെറ്റുണ്ട് കെ.ഡി ... ഞാൻ ആ ഭാഗം വന്നപ്പോൾ അന്ന് തിയേറ്ററിൽ നിന്നും പുറത്തേക്കു popcorn വാങ്ങാൻ പോയിരുന്നു എന്ന് തോന്നുന്നു !!!

Utopian:

"യേശൂട്ടൻ.. " തൃശൂർ സ്ലാങ്

Sari Chechi:

32.സിൽക്ക് സ്മിത യെ മിസ്സാകുന്ന തലമുറയാണ്  ഞാനൊക്കെ.. അവറെ ഇഷ്ടമാണോ?

ഇഷ്ട്ടമാണോന്നോ !!! തട്ടത്തിന്മറയത്തിൽ നിവിൻ പറയുന്ന പോലെയാണ് ...... "എന്റെ സാറേ ..... " !!!!

KD:

2. ഡൊണാൾഡ് ട്രമ്പിൽ നിന്നും പുതുതലമുറ ഉൾക്കൊള്ളേണ്ട മൂന്നു ഗുണഗണങ്ങൾ ഏതൊക്കെയാണ്?

1. ബുദ്ധി ജീവിത വിജയത്തിന് ഒരു തടസ്സമല്ല 

2. ആരെ വെറുപ്പിച്ചാലും  പറഞ്ഞാലും , ഭൂരിപക്ഷത്തെ സുഖിപ്പിച്ചാൽ   ഭരണത്തിലെത്താം 

3. മണ്ടത്തരം പറയുന്നുണ്ടോ എന്നല്ല ; അതെത്ര കോണിഫിഡൻസിൽ പറയുന്നു എന്നതിലാണ് കാര്യം

Sari Chechi:

33.പൊടുന്നനെ താങ്കൾക്ക് കൊറോണ വൈറസിനെ നഗ്നനേത്രങ്ങൾ കൊണ്ട് കാണാൻ  പറ്റിയാൽ എന്തൊക്കെ ചെയ്യും?

KD:

3. കേരളത്തിലെ സദാചാരഗുണ്ടകളോട് കൊടുക്കാനുള്ള ഉപദേശം എന്താണ്?

"അനിയാ ,,,, ആരാന്റെ അമ്മയ്ക്ക് ഭ്രാന്തു പിടിച്ചാൽ കാണാൻ നല്ല ചേലുണ്ടാകും ... ചുമ്മാതെ ഇങ്ങനെ നാട്ടുകാരെ നന്നാക്കാൻ നടക്കാതെ , പോയി സ്വയം നന്നാവാൻ നോക്കെടാ ..."

Shaheem:

അങ്ങനെ ചോദ്യോത്തര പരിപാടി സമയം ( 12 .01 am to 12.01 pm ) കഴിഞ്ഞെന്നു തോന്നുന്നു .... എല്ലാ ചോദ്യങ്ങൾക്കും മനസ്സിൽ വന്ന മറുപടി നൽകാൻ ഞാൻ  ശ്രമിച്ചിട്ടുണ്ട് .... എല്ലാവർക്കും വളരെ നന്ദി ...

< The End >

.. മറക്കാനാവാത്ത ഒരു 'വാലന്‍റൈന്‍സ് ഡേ' …

ഞാൻ കോളേജിൽ പഠിക്കുന്ന കാലഘട്ടത്തിലെ ഒരു മറക്കാനാവാത്ത വാലന്‍റൈന്‍സ് ഡേ സംഭവം ::


അന്ന് കോളേജിലെ എന്റെ ഗ്യാങ്ങിൽ ഞാൻ കൂടാതെ ഉള്ളത് മറ്റ് മൂന്നു പേരാണ്.


അതിലൊരുത്തന് കോളേജിലെ അടുത്ത ബാച്ചിൽ സ്വന്തമായി ഒരു സുന്ദരി കാമുകിയുണ്ട്.  അത് കൊണ്ട് തന്നെ ആ വാലന്‍റൈന്‍സ് ഡേയിൽ അവനെ ഞങ്ങളുടെ അടുത്ത് കിട്ടാൻ സാധ്യതയില്ല. 


അടുത്തവന് , എന്റെ ക്ലാസ്സിൽ പഠിക്കുന്ന  ഒരു പൊട്ടൻഷ്യൽ കാമുകി കൂട്ടുകാരിയുണ്ട്. ആ വർഷത്തെ വാലന്‍റൈന്‍സ് ഡേയിലാണ് അതിന്റെ റിസൾട്ട് അറിയുക എന്നതാണ് സിറ്റുവേഷൻ. മൊത്തത്തിൽ അവിടെ എന്തും സംഭവിക്കാൻ സാധ്യതയുള്ളത് കൊണ്ട് , ആ ദിവസം അവന്റെ അടുത്ത് നിന്നും മാറി നിൽക്കുന്നതാണ് ബുദ്ധി എന്ന് എനിക്ക് തോന്നി.


മൂന്നാമത്തവൻ , കോളേജിലെ എല്ലാ മുക്കും മൂലയും അരിച്ചു പെറുക്കി , തന്റെ ഭാവി കാമുകിയെ തേടിയുള്ള നടപ്പിൽ ആണ്. എല്ലാ ദിവസവും അവന് ഈ പണിയാണെങ്കിലും , ആ വാലന്‍റൈന്‍സ് ഡേയിൽ എങ്കിലും അവളെ കണ്ടെത്തുമെന്ന ശുഭാപ്തി വിശ്വാസത്തിലാണ് കക്ഷി. ഏതെക്കെയോ അമ്പലത്തിലും പള്ളിയിലുമൊക്കെ  നേർച്ചയിട്ടിട്ടൊക്കെയുണ്ട് അവൻ. അത് കൊണ്ട് , അവന്റെ കൂടെ ഞാൻ നടന്നാൽ, ആയിടെ ഞാൻ വാങ്ങിയ എന്റെ ബാറ്റയുടെ പുത്തൻ ചെരുപ്പ് തേയും എന്ന് എനിക്കുറപ്പാണ്. അത് കൊണ്ട് എന്റെ പ്രിയപ്പെട്ട ബാറ്റ ചെരുപ്പിനെ ഓർത്തു , അത്രമാത്രം പ്രിയനല്ലാത്ത അവനെയും അന്ന് കാണാതെ ഇരിക്കുന്നതാണ് ഉത്തമം എന്ന് ഞാൻ മനസ്സിലാക്കി.


അങ്ങനെ എല്ലാം കൊണ്ടും , കൂട്ടിയും കുറച്ചും  ഗുണിച്ചും ഹരിച്ചും നോക്കി ഞാൻ ഒരു തീരുമാനം എടുത്തു. 'പൂച്ചയെക്കന്താ പൊന്നുരുക്കിടത്തു കാര്യം' എന്ന തിയറി പ്രകാരം; വാലന്‍റൈന്‍സ് ഡേയുടെ അന്ന് , ഞാൻ മാന്യമായി ക്ലാസ്സ് കട്ട് ചെയ്തു വീട്ടിൽ ഇരിക്കാൻ തീരുമാനിച്ചു. എന്റെ ആ കടുത്ത നടപടി എല്ലാ കൂട്ടുകാരെയും  മുൻപത്തെ ദിവസം തന്നെ അറിയിച്ചു , എല്ലാർക്കും ബേസ്ഡ് ഓഫ് ലുക്ക് ഒക്കെ നേർന്നു , ആ വർഷത്തെ വാലന്റൈൻസ് ഡേയുടെ പകൽ മൂടിപ്പുതച്ചു കിടന്നുറങ്ങിയ എന്റെ ഉറക്കം ശല്യപ്പെടുത്തി , രാവിലെ  ഒരു 10.30 മണിയോടെ, മൊബൈൽ ഫോണുകളില്ലാത്ത ആ കാലത്തെ സൂപ്പർ താരമായ  എന്റെ വീട്ടിലെ ലാൻഡ് ഫോൺ നിർത്താതെ ബെല്ലടിച്ചു.


ഉറക്കച്ചടവിൽ വന്നു ഫോണെടുത്ത ഞാൻ :: " ഹലോ …. "


അപ്പുറത്തു നിന്നും ഒരു കിളിനാദം , " ഹലോ … ?"


ആളെ പിടികിട്ടാത്ത ഞാൻ , " ആരാണ് ? എന്താണ് ? എങ്ങനാണ് ?"  !!!


വീണ്ടും കിളിനാദം , "  നീ ഇന്ന് എന്താണ് കോളേജിൽ വരാത്തത് ?"


ഒന്നും മനസ്സിലാകാത്ത ഞാൻ , " ആരാണത് ? ആളെ അങ്ങട്ട് മനസ്സിലായില്ല ?"


അപ്പുറത്തു നിന്നും വീണ്ടും പരിഭവത്തിൽ  , " ഇന്ന് ഉച്ചയ്ക്ക് കാന്റീനിൽ നീ ലഞ്ചിന്‌ വരുമ്പോൾ , എനിക്ക്  നിന്നോട് ഒരു കാര്യം പറയാനുണ്ടായിരുന്നു. എന്നിട്ടു ഇന്നത്തെ ദിവസം  നോക്കി  നീ കോളേജിലില്ല !! ശരിയപ്പോൾ , ഇനിയിപ്പോൾ  അടുത്ത കൊല്ലമാവട്ടെ . നിനക്ക് അവിടെ  വേറെ കുഴപ്പം ഒന്നുമില്ലെന്നുറപ്പിക്കാൻ ഞാൻ വിളിച്ചതാണ്. ശരിയപ്പോൾ , ടേക്ക് കെയർ …"


അപ്പോഴേക്കും ഞാൻ ആകെ കുഴങ്ങി. ശെടാ !! ഇതിപ്പോൾ ആകെ ഡെസ്പ് സിറ്റുവേഷൻ ആയല്ലോ !! ഞാൻ കാത്തു കാത്തിരുന്നു ഒടുവിൽ എന്റെ മാമ്പഴം ഒന്ന് പൂത്തപ്പോൾ , അന്നത്തെ ദിവസം നോക്കി തന്നെ ഞാൻ നോയമ്പെടുത്തു എന്ന് പറഞ്ഞപോലെയായി !!! വേറെ ഏതേലും കാക്ക വന്നു അത് കൊത്തി കൊണ്ടു പോകും മുൻപ് , ഉടനെ എന്തെങ്കിലും ചെയ്യണം .


ഞാൻ വീണ്ടും , " ഹലോ  .. ഹലോ  .. വെക്കല്ലേ , വെക്കല്ലേ … അതേ , ആരാ പറഞ്ഞത് ഞാൻ കോളേജിൽ വരുന്നില്ലെന്ന് !! ഇന്ന് കുറച്ചു ലേറ്റ് ആയിപ്പോയതാണ് ഞാൻ . ലഞ്ച് ടൈം ആകുമ്പോൾ ഞാൻ കാന്റീനിൽ കാണും ... കുട്ടി ആരാണ് എന്ന് പറഞ്ഞില്ല ....എന്താ പേര് ? എവിടാ വീട്  ? ഏതാ  ക്ലാസ്സ്  ? ഏതാണ് കുട്ടിയുടെ നക്ഷത്രം ?"


അപ്പോൾ കുട്ടി ; " ഇനിയിപ്പോൾ  കൂടുതൽ വിശേഷം നമുക്ക് കാന്റീനിൽ നേരിട്ട് കാണുമ്പോൾ പറയാം . ശരിയപ്പോൾ ... "


എന്റെ മനസ്സിൽ ഒരു ഡസൻ ലഡ്ഡുകൾ പൊട്ടി ചിതറി . എന്റെ ചുറ്റുമുള്ള ഈ വൃത്തികെട്ട ലോകം അതി മനോഹരമാണെന്നു എനിക്ക് അന്ന് ആദ്യമായി തോന്നി. കണ്ണാടിയിൽ എന്റെ കോലം നോക്കി ഞാൻ എന്നോട് തന്നെ പറഞ്ഞു ,
" ഈ കൂറ ലുക്കും വെച്ച് എങ്ങനെ സാധിക്കുന്നെടാ ഉവ്വേ ? കൊച്ചു ഗള്ളൻ  .....  എന്നെ  സമ്മതിക്കണം ..." !!!!


എന്റെ കയ്യിൽ ആകെയുണ്ടായിരുന്ന നൂറു രൂപ നോട്ടുമെടുത്തു , മുഖത്ത് പൗഡറും , ദേഹത്തു സ്പ്രേയുമടിച്ചു , ഞാൻ വീട്ടിൽ നിന്നുമിറങ്ങി പല്ലുപോലും തേക്കാതെ ഓടി . അടുത്ത ജംക്ഷനിൽ ചെന്ന് ഓരോ ഓട്ടോ വിളിച്ചു ഞാൻ ചേട്ടനോട് അലറി , " പറത്തി വിട്ടോ ചേട്ടാ , അടുത്ത അര മണിക്കൂറിൽ എനിക്ക് കോളേജിലെത്തണം .... "


"ശോ  , ഇപ്പോഴത്തെ പിള്ളേർക്ക് പഠിക്കാനിത്രയും ആക്രാന്തമോ " !! എന്ന ഭാവത്തിൽ ചേട്ടൻ എന്നെ അതിശയത്തിൽ നോക്കി. എന്റെ ടെൻഷനും വേവലാതിയും കണ്ടു ചേട്ടൻ തിരക്കി ,
" മോന് ഇന്ന് വലിയ പരീക്ഷയാണോ  ? "


ഇനിയിപ്പോൾ ചേട്ടന്റെ സ്പീഡ് കുറക്കണ്ട. ഞാനും ശരിവെച്ചു , " അതെ ചേട്ടാ , കുറെ കാലമായി കാത്തിരുന്ന വലിയ പരീക്ഷയാണ്. ഇത് തോറ്റാൽ ഇനി അടുത്തൊന്നും ഇങ്ങനൊരു പരീക്ഷ ഒത്തു വരില്ല ..."


അങ്ങനെ , ആ ടൗണിലെ ഊടുവഴികളൂടെ , ഒരു ഭ്രാന്തനെ പോലെ കുതറി ഓടിയ ആ ഓട്ടോ , ഒടുവിൽ എന്റെ കോളേജിന്റെ വളവിലെത്തിയതും , എന്റെ കയ്യിൽ ആകെയുള്ള  നൂറു രൂപയും ചേട്ടന് കൊടുത്തു , ബാക്കി ചില്ലറ ചേട്ടൻ വെച്ചോളാൻ പറഞ്ഞു , ഞാൻ കാന്റീനിന്റെ സൈഡിലെ മതിൽ ചാടി കയറി.


ഭാഗ്യം , ലഞ്ച് സമയം ആയതേ ഉള്ളു. പതിവ് പോലെ കാന്റീനിൽ സ്ഥിരം പ്രണയജോഡികളും , പിന്നെ ഞാനൊഴികെയുള്ള മറ്റു വായിനോക്കികളും മാത്രമേ ഉള്ളു. ഇല്ല , എന്റെ അജ്ഞാത സുന്ദരി ഇതുവരെ എത്തിയിട്ടില്ല. കാരണം അവിടെ  ഒറ്റപ്പെട്ട പെൺതരികളൊന്നുമില്ല. എന്റെ സ്ഥിരം വായിനോക്കി ഗ്യാങിലെ മറ്റുള്ളവരെ കാണാതെ ഞാൻ ഒളിഞ്ഞു നേരെ കാന്റീൻ വാതിലിന്റെ അടുത്തുള്ള ബെഞ്ചിൽ തന്നെ , അകത്തു കയറി വരാൻ പോകുന്ന എന്റെ സുന്ദരിയെയും നോക്കി ഞാൻ ആകാംഷയോടെ കുത്തിയിരുന്നു.
അല്ലേലും , ഇനിയിപ്പോൾ ഈ വായിനോക്കി കൂട്ടുകെട്ടൊക്കെ നിർത്തണം. ഇന്ന് മുതൽ ഞാനും ജോഡിയാകാൻ പോകയല്ലേ ! ഈ വായിനോക്കി കൺട്രി ഫെല്ലോസ് , ഇവനൊന്നും വേറെ പണിയില്ലേ ഇങ്ങനെ സിംഗിൾ ആയി നടക്കാൻ !!!


ഏതാണ്ട് അടുത്ത രണ്ടു മണിക്കൂർ ഞാൻ അവിടെ ആ കുത്തിയിരുപ്പ് തുടർന്നിട്ടും  , കിലുക്കത്തിലെ രേവതി പറഞ്ഞ പോലെ , 'ജ്യോതിയും വന്നില്ല തീയും വന്നില്ല, ഒരു മണ്ണാങ്കട്ടയും വന്നില്ല'  !! അവസാനം വൈകിട്ട് ആ കാന്റീൻ അടക്കാനായി അവിടത്തെ ചേട്ടൻ എന്നെ കഴുത്തിന് പിടിച്ചു  പുറത്താക്കി. അപ്പോഴേക്കും പുറത്തിരിക്കുന്ന വായിനോക്കി ഗ്യാങ്ങിലേക്കു തെറിച്ചു വീണ എന്നെ നോക്കി അവർ മൊഴിഞ്ഞു .....


" ഡാ , അളിയാ !!! നീ ഇന്ന് കോളേജിൽ വരുന്നില്ലെന്ന് പറഞ്ഞിട്ട് ,  ഇപ്പോൾ എങ്ങനെ നീ ഈ കാന്റീനിനുള്ളിൽ നിന്നും പുറത്തേക്കു തെറിച്ചു വീണു ?" !!!!


ഞാൻ ചമ്മലോടെ പറഞ്ഞു ; " ഒന്നുമില്ലെടാ മച്ചാന്മാരെ ... ഈ കാന്റീനിലെ ഭക്ഷണത്തിന്റെ രുചി , അത് നമ്മുടെ വീട്ടിലെ ഫുഡിന് കിട്ടുമോ !!! അത് കൊണ്ട് ഞാൻ ഫുഡ് കഴിക്കാൻ വന്നതാണ് ... "


അപ്പോൾ അതിലൊരുത്തൻ , " എടാ …. "


ഞാൻ , "എന്താടാ .... "


അവൻ :: " ഇന്ന് ഉച്ചയ്ക്ക് കാന്റീനിൽ നീ ലഞ്ചിന്‌ വരുമ്പോൾ , എനിക്ക്  നിന്നോട് ഒരു കാര്യം പറയാനുണ്ടായിരുന്നു. എന്നിട്ടു ഇന്നത്തെ ദിവസം  നോക്കി  നീ കോളേജിലില്ല !! "


അതെ , അതേ  ഡയലോഗ് !!!! അപ്പോഴേക്കും എനിക്ക് ഏതാണ്ട് കാര്യങ്ങൾ പിടികിട്ടി !! എല്ലാ അലവലാതികളും കൂടി , വീട്ടിൽ മര്യാദയ്ക്ക് ക്ലാസ്സ് കട്ട് ചെയ്തിരുന്ന എനിക്കിട്ടു മുട്ടൻ പണി തന്നതാണ് !!!! ഇനിയിപ്പോൾ കോളേജിൽ എന്റെ മാനം പോയി ,അവിടെ  കണ്ണിൽ കണ്ട എല്ലാത്തിനെയും ഉള്ള തെറിമുഴുവൻ പറഞ്ഞു. അങ്ങനെ ഞാൻ എന്റെ കോളേജിലെ അക്കൊല്ലത്തെ  വാലന്‍റൈന്‍സ് ഡേ ബലിയാടായി.


പിന്നീട് ആ കൂട്ടുകാരിൽ നിന്നും , എനിക്ക് കിട്ടിയ പണിയുടെ പൂർണ വിവരങ്ങൾ ചോദിച്ചറിഞ്ഞു , തിരികെ  കൺസഷൻ ടിക്കറ്റെടുത്ത് ബസ്സിൽ വീട്ടിൽ പോകാൻ, അവരോടു കടം വാങ്ങിയ പത്തു രൂപ നോട്ടുമായി ഞാൻ നടക്കവേ , കോളേജ് ബസ് സ്റ്റോപ്പിലെ ടെലിഫോൺ  ബൂത്തിലിരിക്കുന്ന ചേച്ചിയോട് ഞാൻ ,  സുരാജ് വെഞ്ഞാറൻമൂട് സിനിമയിൽ പറഞ്ഞ പോലെ ദയനീയമായി പറഞ്ഞു ….


" ചേച്ചി .... വല്ല അലവലാതികളും വന്നു പറഞ്ഞെന്നും പറഞ്ഞു , പറ്റിക്കാനാണേലും ഇങ്ങനെ ഒന്നും ആരെയും ഫോൺ വിളിച്ചു പറ്റിച്ചു , ഇല്ലാത്ത പ്രണയ പ്രതീക്ഷ കൊടുക്കരുത്…പ്ളീസ് …  "


< എല്ലാം ശുഭം >

... വ്യായാമം ...

ഈയടുത്തായി , ഒരു ശനിയാഴ്ച രാവിലെ മൂടി പുതച്ചു കിടന്നുറങ്ങുന്ന എന്നെ തട്ടിയുണർത്തി ഭാര്യ അരുൾ ചെയ്തു ….

" അല്ലയോ ഭവാനേ , അങ്ങ് ഇങ്ങനെ അവധി ദിവസം കൂർക്കം വലിച്ചുറങ്ങി കളയാതെ , പോയി ഒരു മണിക്കൂർ എന്തേലും വ്യായാമം ചെയ്തു , കുറഞ്ഞു വരുന്ന അങ്ങയുടെ ആരോഗ്യം വർധിപ്പിക്കുകയും , ഉയർന്നു വരുന്ന ആ തിരു കുടവയർ കുറയ്ക്കുകയോ ചെയ്യൂ ….. "

ഭവതിയുടെ ആ ആക്ഷേപ അപേക്ഷയിൽ അൽപ്പം കാര്യമുണ്ടെന്നും , ഇനിയും അവിടെ കിടന്നുറങ്ങിയാൽ ചിലപ്പോൾ ഒരു യുദ്ധം അവിടെ നടക്കാമെന്നും മുൻകൂട്ടി കണ്ട ബുദ്ധിമാനായ മഹാ രാജൻ , മടിച്ചു മടിച്ചു ഹാളിലെ സോഫയിലിരുന്നു ചിന്തിച്ചു …. "ഇന്നിനി നടക്കാനോ ഓടാനോ പോകാതെ , എങ്ങനെ എളുപ്പത്തിൽ വ്യായാമം ചെയ്യുകയും , അതെ സമയം ഭവതിയെ ഇമ്പ്രെസ്സ് ചെയ്യുകയും ചെയ്യാം … ?"

അപ്പോഴാണ് , അടുത്തിടെ ഭവതി ഉണർത്തിയ സങ്കടം രാജന്റെ മനസ്സിൽ ഓടിയെത്തിയത് …. " കൊട്ടാരത്തിന്റെ പുറം വശം ആകെ , കാട് പിടിച്ചു നശിച്ചിരിയ്ക്കുകയാണ് … ഒന്ന് പോയി ആ കാട് തെളിച്ചു വൃത്തിയാക്കി കൂടെ , മടിയനായ രാജന് …"

അതെ , ഇത് തന്നെ അവസരം , ഇന്ന് രാവിലെ കാട് വെട്ടിത്തെളിച്ചു , കൊട്ടാരത്തിന്റെ പുറം വശം ക്ലീൻ ഷേവ് ആക്കാം … കൊട്ടാര വളപ്പ് ചെറുതായതു കൊണ്ടും , കാട് വളർന്നു വരുന്നതേ ഉള്ളത് കൊണ്ടും , വലിയ പാടില്ലാതെ അര മണിക്കൂറിൽ ആ പണി തീരും , ഇന്നിനി നടക്കാനും പോണ്ട , രാജ്ഞി സന്തോഷവതിയും ഇമ്പ്രെസും ആകും !!!

തന്റെ ബുദ്ധി സമ്മതിക്കണം എന്ന് അഭിമാനം കൊണ്ട് ,അങ്ങനെ അടിച്ചു പൊളിക്കാനുള്ള ആഗ്രഹവുമായി , ഉള്ള ടൂൾസും എടുത്തു രാജൻ കാട്ടിലേക്കിറങ്ങി , കണ്ണിൽ കണ്ട കാടെല്ലാം അരമണിക്കൂർ നേരം കൊണ്ട് വെട്ടി തെളിച്ചു,ആരോടൊക്കെയോ ഉള്ള അരിശം തീർത്തു , ബാക്കിയുള്ള അരമണിക്കൂർ നേരം ഹാളിലെ സോഫയിൽ കിടന്നുറങ്ങി കൂർക്കം വലിച്ചു ഉറങ്ങി …

" ആഹാ , ബെസ്ററ് … മുകളിൽ നിന്ന് വന്നു ഇവിടെ സോഫയിൽ ഉറങ്ങുകയാണോ നിങ്ങൾ " , എന്ന് വിലപിച്ച രാജ്ഞിയോട് രാജൻ അരുൾ ചെയ്തു ….

" നീ ചുമ്മാ ഡയലോഗ് അടിക്കാതെ , ആ പുറത്തോട്ടു ഇറങ്ങി നോക്കിയേ …. അപ്പോളറിയാം ഈ രാജൻ ആരാന്ന് ..."

ഇതെന്താ സംഭവം എന്നും കരുതി , കൊട്ടാരത്തിന്റെ പുറത്തേക്കിറങ്ങിയ രാഞ്ജി , തലയിൽ കൈവെച്ചു ഉറക്കെ നിലവിളിച്ചു .....

" അയ്യോ !! ഈ മനുഷ്യന്റെ ഒരു കാര്യം !!! ഞാൻ ഇവിടെ കഷ്ട്ടപ്പെട്ടു നട്ടു വളർത്തുന്ന കറിവേപ്പില ചെടിയും , ബാക്കി പച്ചക്കറി ചെടിയുമൊക്കെ , കാടാണെന്നും പറഞ്ഞു വെട്ടിക്കളഞ്ഞിരിക്കുന്നു … നിങ്ങളെ ഇന്ന് ഞാൻ ...… " !!!!!!!

തിരിച്ചു രാജനെ തിരക്കി സോഫയിൽ എത്തിയ രാഞ്ജി , അവിടെ കിടന്ന രാജന്റെ പൂട പോലും കാണാതെ , പല്ലും തേക്കാതെ ഉറക്കമെഴുന്നേറ്റു വരുന്ന രാജകുമാരിമാരോട് തിരക്കി ....

" ഇവിടെ കിടന്നിരുന്ന നിങ്ങടെ ബാപ്പ മഹാ രാജൻ സാധനമെവിടെ …"?

അപ്പോൾ കുമാരിമാർ …

" എന്താണ് എന്ന് അറിയില്ല , ഉമ്മച്ചി പുറത്തു നിന്നും നിലവിളിച്ചു പറഞ്ഞത് കേട്ടതും , തനിക്കു വ്യായാമംചെയ്യാൻ വൈകിയല്ലോ എന്നും പറഞ്ഞു , ബാപ്പ മഹാരാജൻ ഇവിടുന്നു ചാടി എഴുന്നേറ്റു , മുൻവശത്തെ മതിലും ചാടി എങ്ങോട്ടോ ഓടി പോയി !!! ആ ഓട്ടം കണ്ടിട്ട് ഇനി അടുത്തൊന്നും കാണുമെന്നു തോന്നുന്നില്ല .... " !!!

[ ഗുണപാഠം :: " വ്യായാമം ചെയ്യാതിരിക്കാനുള്ള മടിക്കും , ഉഡായിപ്പിനുമൊക്കെ , നിങ്ങള്ക്ക് വലിയ വില കൊടുക്കേണ്ടി വന്നേക്കാം " ]

... വികട സരസ്വതി കടാക്ഷങ്ങൾ ....

എന്റെ ജീവിതത്തിൽ പലപ്പോഴായി സംഭവിച്ച,  വികട സരസ്വതീ ദേവീ കടാക്ഷങ്ങളുടെ നീണ്ട ലിസ്റ്റിൽ നിന്നും , എനിക്ക് പ്രിയപ്പെട്ട മൂന്നു കടാക്ഷങ്ങളുടെ ഒരു ഓർമ്മക്കുറിപ്പ് ആണ് ഇത് ….


ആദ്യം, ഒരു സ്കൂൾ കാല കടാക്ഷം:
ദൂരദർശൻ ചാനൽ മാത്രമായി മലയാള ടെലിവിഷൻ ലോകം അടക്കി വാഴുന്ന സുവർണ കാലഘട്ടം.
അന്നേ ദിവസം രാത്രി ഏഴു മണിക്ക് മലയാള സീരിയൽ 'ആവർത്തനം' കെൽട്രോൺ കളർ ടിവിയിൽ വീടിനു അകത്തു തകൃതിയായി നടക്കുന്നു.
ഏഴാം ക്ലാസ്സു മലയാളം മീഡിയത്തിലെ 'ജീവശാസ്ത്രം' ടെക്സ്റ്റ് ബുക്കിൽ മനുഷ്യ ശരീരത്തിന്റെ പ്രവർത്തനത്തെ/ഘടനയെ പറ്റി , കാണാതെ ഉരുവിട്ട്  പഠിച്ചു കൊണ്ട് ഈ പാവം ഞാൻ, വീടിന്റെ വരാന്തയിലും ഇരിക്കുന്നു.
അപ്പോഴാണ് അപ്രതീക്ഷിതമായി , ഏതോ കല്യാണം വിളിക്കാനായി  , വളരെ സീരിയസ് ആയി ഒരു ചേച്ചി വീട്ടിൽ കയറിവന്നു എന്നോട് ധൃതിയിൽ ചോദിച്ചത് , " മോനേ , വീട്ടുകാരെവിടെ ?"  .


ഞാൻ അത് വരെ കാണാതെ പഠിച്ചോണ്ടിരിക്കുന്ന  ആ പാരഗ്രാഫിന്റെ ഫ്ളോ അങ്ങ്  പോകുമല്ലോയെന്ന് പിറുപിറുത്തും , ഇതെന്താണ് ഈ രാത്രിയിൽ മിനക്കെടുത്താൻ ഈ അമ്മച്ചി എന്നും പുലമ്പി  , ഞാൻ  അവരുടെ മുഖത്ത് പോലും നോക്കാതെ , പെട്ടെന്ന് മറുപടിയും കൊടുത്തു ....
" അവരൊക്കെ അകത്തു ടിവിയിൽ 'ആർത്തവം' കണ്ടു കൊണ്ടിരിക്കുകയാണ് ..."
ചേച്ചി എന്നോട് അത്ഭുതത്തോടെ , " എന്ത് കണ്ടു കൊണ്ട് എന്ന് ?..'.!!


ഞാൻ വീണ്ടും ദേഷ്യത്തിൽ , " ആർത്തവം ഇല്ലേ .. ഏഴു മണിക്കുള്ള സീരിയൽ   , ആർത്തവം " !!!
അത് വരെ മസിലുപിടിച്ചിരുന്ന ആ ചേച്ചി , പിന്നെ അവിടെ നിന്നും , ഇരുന്നും കിടന്നും ചിരിച്ചു  തളർന്നു .
പെട്ടെന്ന് വികടത പിടികിട്ടിയ ഞാൻ ചമ്മലോടെ ,
" സോറി ചേച്ചി .. ആ സാധനം ഇവിടെ, ഈ  ടെക്സ്റ്റ് ബുക്കിലാണ് .. അകത്തുള്ളത് 'ആവർത്തനം',  'ആവർത്തനം',  സീരിയൽ ആണ് ... "


ഇനി , കോളേജ് കാല കടാക്ഷം:
എനിക്ക് ഇടയ്ക്കിടെ കോളേജിൽ തല്ല് കിട്ടാതെ ഇരിക്കാനും, പ്രത്യേകിച്ച് വലിയ പണിയെടുക്കാതിരിക്കാനും ആയി , കോളേജ് ബാച്ചിലെ എസ്.എഫ്.ഫൈ ലോക്കൽ സ്റ്റുഡന്റ് നേതാവിന്റെ വലംകൈയായി  , ഞാൻ തെളിഞ്ഞു നടക്കുന്ന എന്റെ കോളേജ് കാലം.


ഈ ലോകത്തെ എന്തിനെ പറ്റിയും ആധികാരികമായി മണിക്കൂറുകൾ കടുത്ത ഭാഷാ പ്രയോഗത്തിൽ സംസാരിക്കുന്ന എന്റെ നേതാവിന്റെ കൂടെയുള്ള ആ നടത്തത്തിൽ , എന്നെ ഹഠാദാകർഷിക്കുന്നത് , ജൂനിയർ പെൺകുട്ടികളുടെ ഗ്രൂപ്പ് ഒക്കെ കാണുമ്പോൾ , ഒരു ഉളുപ്പും കൂടാതെ അവരുടെ ഇടയിലേക്ക് വലിഞ്ഞു കയറി ചെന്ന് , പോളണ്ടിനെ പറ്റിയും , ചൈനയെ പറ്റിയും വലിയ കാര്യങ്ങൾ പറഞ്ഞു ; തനിക്കു ഭാവി പെൺവോട്ടുകൾ ഉറപ്പിക്കുന്ന അവന്റെ ആ പ്രത്യേക സ്കില്ലിൽ ആണ് .
പെൺകുട്ടികളുടെ ഇടയിലോട്ടു  എനിക്കും ഇടിച്ചു കയറാം എന്നതും ; പ്രസംഗിക്കുന്ന തിരക്കിൽ അവനും , ആ ബോറടി കേൾക്കുന്ന തിരക്കിൽ പെൺപിള്ളേരും ആണെങ്കിലും ; ഒട്ടും തിരക്കൊന്നുമില്ലാത്ത എനിക്ക്, അവിടെ തികച്ചും സൗജന്യമായി അന്തസായി വായിനോട്ടവും നടക്കും.
ഇടയ്ക്കു ഏതെങ്കിലും ഗ്യാപ്പിൽ , എനിക്ക് എന്തേലും പിടിയുള്ള ടോപ്പിക് വന്നാൽ , ഞാൻ ചിലപ്പോൾ ഒന്നോ രണ്ടോ വാക്കു നേതാവിന് അഭിപ്രായമായി എറിഞ്ഞു കൊടുക്കും . പിന്നെ , അവൻ അതിൽ പിടിച്ചു അടുത്ത അരമണിക്കൂർ കത്തിച്ചു വിട്ടോളും .


ഒരിക്കൽ അവൻ, ആ പാവം പ്രീഡിഗ്രി പിള്ളേരോട് , നമ്മുടെ പാർട്ടി നാട്ടിൽ ചെയ്യുന്ന സഹായങ്ങളുടെ കൂട്ടത്തിൽ ,  ആ ഡയലോഗ് കൂടി അടിച്ചത്  . "കൊല്ലത്തെ കശുവണ്ടി തൊഴിലാളികളുടെ കാര്യം .... "
ഞാൻ പുറകിൽ നിന്നും കൂടെ ആഡ് ചെയ്തു ... " കൂടാതെ , ആലപ്പുഴയിലെ 'കഴുത്തറി' 'പയർ' തൊഴിലാളികളും ..."
അവൻ ആ ഫ്ളോയിൽ അതും ഏറ്റു പറഞ്ഞു ... "അത് തന്നെ , ആലപ്പുഴയിലെ 'കഴുത്തറി' 'പയർ' ..... " .എന്നിട്ടു എന്നോട് , " എന്ത് തൊഴിലാളികൾ ?"


ഞാൻ വീണ്ടും കട്ട ജാടയിൽ , "നമ്മുടെ 'കഴുത്തറി' 'പയർ' ".... ശേ , തെറ്റിയല്ലോ , ഒരു മിനിറ്റേ.. " സോറി നേതാവേ ..... കൈത്തറി ... കയർ ..."
എന്തായാലും അവിടെ പ്രസംഗം ചീറ്റിയ ആ ഗ്യാപ്പ് നോക്കി , കുറെ നേരമായി രക്ഷപ്പെടാനായി തക്കം പാർത്തിരുന്ന ആ  പെൺകുട്ടികൾ . ഞങ്ങളെ ആ വിഷയത്തിനു ആവശ്യത്തിലധികം കളിയാക്കി ചിരിച്ചോണ്ട് അവിടന്ന് നൈസിനു ഇറങ്ങിയും പോയി .


അപ്പോൾ നേതാവ്  എന്നോട് , "ഇനി മുതൽ ബുദ്ധിപരമായ ചർച്ചകൾക്ക് വരേണ്ടെന്നും , പോസ്റ്ററൊട്ടിക്കാനും ജാഥ വിളിക്കാനും മാത്രം കൂടെ ചെന്നാൽ മതിയെന്ന് , എന്നെ  തരം താഴ്ത്തുകയും ചെയ്തു . പിന്നീട്  ആ നടപടിയിൽ മനം നൊന്തു , ഞാൻ ആ ചെറുപ്രായത്തിൽ തന്നെ , സജീവ രാഷ്ട്രീയത്തിൽ നിന്നും വിരമിക്കുകയും ; എന്നിട്ട് സ്വതന്ത്ര ബുദ്ധിജീവിയായി , തരം കിട്ടുമ്പോൾ നേതൃത്വത്തെ വിമർശിച്ചു സംതൃപ്തിപ്പെടുകയും ചെയ്തു .


അവസാനമായി, ഒരു ഓഫീസ് കാല കടാക്ഷം:
നാല് സീറ്റുകൾ ഉള്ള എന്റെ ഓഫീസ് ക്യൂബിക്കിളിൽ  , രാവിലെ തന്നെ എന്റെ ടേബിളിന്റെ  സൈഡിൽ വന്നിരുന്നു  ഒരുത്തൻ, അവിടെ ക്രോസ്സ്  ഇരിക്കുന്നവനുമായി , സാമൂഹ്യ ചർച്ചകൾ തുടങ്ങി !!


റബ്ബർ , എള്ള് , ചുക്ക് , ഏലം, കുരുമുളക് എന്നിവയ്ക്കൊക്കെ ഉണ്ടാവുന്ന വിലയിടിവ് , ഇതൊക്കെയാണ് തോട്ടം മുതലാളി കൂടിയായ അച്ചായൻ   സോഫ്റ്റ്‌വെയർ ഡെവലപ്പറിന്റെ , ഇന്നത്തെ പ്രധാന പ്രശ്നങ്ങൾ.
അടുത്ത കോണിൽ ഇരിക്കുന്ന , പുതിയ ജൂനിയർ എഞ്ചിനീയർ പെൺകുട്ടികളെ , തന്റെ പാണ്ഡിത്യവും സമ്പന്നതയും അറിയിച്ചു ഇമ്പ്രെസ്സ് ആക്കുക  എന്നതും അവന്റെ ഹിഡൻ അജണ്ടകളിൽ  ഒന്നാണ്. അവൻ എത്ര ഡയലോഗ് അടിച്ചാലും അതൊന്നും കേൾക്കാത്ത പോലെ , ആ പെൺകുട്ടികളും അവരുടെ ജോലിയിൽ ശ്രദ്ധിച്ചു ഞങ്ങളെ ഇഗ്നോർ ചെയ്യും .


ഈ എള്ള് / ചുക്ക്/ ഏലം, എന്നൊക്കെ ഞാൻ കേട്ടിട്ടുണ്ടെങ്കിലും , ഇതൊക്കെ കണ്ടാൽ തിരിച്ചറിയാൻ അറിയാത്ത ഞാൻ അത് കൊണ്ട് തന്നെ ആ വിഷയത്തിൽ വലിയ അഭിപ്രായം പറയാറില്ല . അപ്പോഴാണ് ഇടയ്ക്കവൻ 'പിന്നെ നാളികേരത്തിന്റെ വില ' എന്ന് പറഞ്ഞു നിർത്തിയത്. അപ്പോഴേക്കും ഞാൻ ആ തേങ്ങയിൽ കയറി പിടിച്ചു.
" അതെ .. തേങ്ങയെ നമ്മൾ മറക്കരുത് . കാരണം , തേങ്ങാ കേരളത്തിന്റെ മൂലക്കുരു ആണല്ലോ ..."


ഞെട്ടിത്തരിച്ചവൻ എന്നോട് .. " തേങ്ങ എന്ത് കുരു ആണെന്നാ പറഞ്ഞത് ?"
അപ്പോൾ കുടിച്ചോണ്ടിരുന്ന വെള്ളം തുപ്പിക്കളഞ്ഞു , ഉറക്കെ ചിരിച്ചു , അടുത്തിരുന്ന ജൂനിയർ പെണ്കുട്ടി , അന്ന് ആദ്യമായി എന്നോട് സംസാരിച്ചു ...
" ചേട്ടാ  ... എണ്ണക്കുരു എന്നാണോ ഉദ്ദേശിച്ചത് .. " !!!!!


ഞാൻ ചമ്മലോടെ, ' സോറി കുട്ടി ... അതേ , ആ കുരു  തന്നെയാണ് ഞാനും ഉദ്ദേശിച്ചത് "....


[ അമേരിക്കയിൽ നിന്നും പ്രസിദ്ധീകരിച്ച '2019  നന്മ ഇയർ ബുക്കിൽ' ഞാൻ എഴുതിയ അനുഭവക്കുറിപ്പിന്റെ പൂർണ രൂപം ആണ് ഈ പോസ്റ്റ്. ]

.... ഒരു പഴയ ബാംഗ്ലൂർ H.R ഇന്റർവ്യൂ അനുഭവം ...

ഞാൻ ഫ്രഷർ ആയി ബാംഗ്ലൂരിൽ ജോലി തപ്പി നടക്കുമ്പോൾ , ഉണ്ടായ ഒരു ഇന്റർവ്യൂ അനുഭവം ആണിത് ….

HP കമ്പനിയുടെ , ഓരോ മണിക്കൂർ ഇടവിട്ട് , BPO വാക്കിൻ ഇന്റർവ്യൂ നടക്കുന്ന സ്ഥലത്തേക്ക് ഞാൻ എത്തിപ്പെട്ടു , അകത്തു കയറാൻ ആയി ഞങ്ങളുടെ ഊഴം കാത്തു കമ്പനിയുടെ പുറത്തു കാത്തു നിൽക്കുമ്പോൾ , ഏതാണ്ട് എന്റെ പകുതിയോളം പൊക്കമുള്ള , ഒരു ന്യൂ ജെൻ സ്റ്റൈലിഷ് പെൺകുട്ടി, എന്റെ അടുത്തെത്തി സിഗററ്റ് വലി തുടങ്ങി !!!

ജീവിതത്തിൽ ആദ്യമായി ഒരു പെൺകുട്ടി സിഗററ്റ് വലിക്കുന്നത് കണ്ട , തനി നാടൻ ആയ ഞാൻ , താജ് മഹാൾ ഒക്കെ കാണും പോലെയുള്ള ഭയങ്കര അതിശയത്തിൽ , മൂക്കത്തു കയ്യും വെച്ച് അവളുടെ മുന്നിൽ പോയി , അവളെ തന്നെ നോക്കി നിന്നു !!! അത് കണ്ടു ഇഷ്ട്ടപ്പെടാത്ത അവർ , എന്നോട് കടുത്ത ഇംഗ്ലീഷിൽ ചോദിച്ചു … " വാട്സ് യുവർ പ്രോബ്ലം ? മൈൻഡ് യുവർ ബിസിനസ്സ് " !!!

ഞാനും മുറി ഇംഗ്ലീഷിൽ പറഞ്ഞു .. " പ്രോബ്ലം നോ ജോബ് ; ആൻഡ് നോ ബിസിനസ്സ് … ഐ ലൂക്കിങ് ജോബ് " !!

എനിക്ക് മനസ്സിലാവാത്ത ഏതോ ഇംഗ്ലീഷ് വാക്കും പറഞ്ഞു അവൾ അകത്തേക്ക് കയറി പോയി . ആ പറഞ്ഞത് തെറിയാകുമെന്നു ഞാൻ അന്ന് ഊഹിച്ചു !! പിന്നീട് , പലയിടത്തു നിന്നും അത് കേട്ടപ്പോൾ , ഇപ്പോൾ എനിക്ക് അന്നത്തെ എന്റെ ഊഹം ശരിയായിരുന്നു എന്നും പിടികിട്ടി !!!

അങ്ങനെ , ഞങ്ങളുടെ ഇന്റർവ്യൂ സമയം എത്തിയപ്പോൾ കമ്പനിക്കകത്തു കയറി പറ്റിയ ഞാൻ ; ഈ സിനിമയിലൊക്കെ കണ്ടു മാത്രം പരിചയമുള്ള ആ സന്ദർഭം ആദ്യമായി നേരിട്ട് കണ്ടു . അതെ , ആ പെൺകുട്ടിയാണ് ഞങ്ങളെ ആദ്യം ഇന്റർവ്യൂ ചെയ്തു എലിമിനേറ് ചെയ്യാൻ പോകുന്ന H.R മാനേജർ !!!! എന്തായാലും എന്റെ ആ ജോലി കാര്യത്തിൽ ഒരു തീരുമാനം ആയെന്നു എനിക്കുറപ്പായി !! എന്തായാലും റൂമിൽ കയറി പോയി , ഇനിയിപ്പോൾ ചടങ്ങു കഴിയാതെ ഇറങ്ങി പോകാൻ പറ്റില്ല . അത് കൊണ്ട് മാന്യമായി അവർ പുറത്താക്കും വരെ അവിടെ ഇരുന്നു.

ഓരോരുത്തരായി എഴുന്നേറ്റു , രണ്ടു മിനിട്ടു നേരം സെൽഫ് ഇൻട്രൊഡക്ഷൻ പറയണം. അതിനു ശേഷം , അവർ എന്തെങ്കിലും ചോദ്യം ചോദിക്കും , അതിനു ഉത്തരം പറയണം . അങ്ങനെ പറഞ്ഞവരിൽ നിന്നും സെലക്ട് ചെയ്യുന്ന നാലോ അഞ്ചു പേര് അടുത്ത റൗണ്ടിൽ പോകും , അല്ലാത്തൊരു പുറത്തേക്കും !!!

എന്റെ അടുത്തെത്തിയതും , ഞാൻ എഴുന്നേറ്റു കാണാതെ പഠിച്ച സെൽഫ് ഇൻട്രോ തുടങ്ങി .... " മൈ നെയിം ഈസ് ഷഹീം. ഐ ആം ഫ്രം കേരള , ഗോഡ്സ് ഓൺ കണ്ടറി ...… "

അത് പറഞ്ഞു മുഴുവിക്കാൻ വിടും മുൻപേ അവൾ കല്പ്പിച്ചു പറഞ്ഞു . " സ്റ്റോപ്പ് ... ടെൽ മി എബൌട്ട് ബാക്ക് വാട്ടർ ടുറിസം ഇൻ കേരളാ " !!!

ശെടാ !! ബാക്ക് വാട്ടർ ടുറിസം !!! ഞാൻ എവിടെയോ കേട്ടിട്ടുണ്ട് , പക്ഷെ എന്താണ് സാധനം എന്നറിയില്ല !!! എന്നാലും എന്റെ ലോജിക്ക് വർക്ക് ചെയ്തു തുടങ്ങി ... വാട്ടർ ഉള്ള കേരളത്തിലെ ഒരു ടുറിസ്റ് പ്ലേസ് ; അതിരപ്പള്ളി - വാഴച്ചാൽ വെള്ളച്ചാട്ടം ഞാൻ കണ്ടിട്ടുണ്ട് ... അത് കൊണ്ട് അത് വെച്ച് ഉത്തരം പൊരിപ്പിക്കാം .... !!!

ഞാൻ .. " എസ് , ഷുവർ ... കേരളാ ഹാസ് മെനി ബാക്ക് വാട്ടർ ടുറിസം പ്ളേസ്സസ് . വാട്ടർ കമിങ് ഫ്രം ബാക്ക് സൈഡ് , ആൻഡ് പീപ്പിൾ വാച്ച് ഇറ്റ് ഫ്രം ഫ്രണ്ട് സൈഡ് ഈസ് സൊ ബ്യൂട്ടിഫുൾ . ദാറ്റ്സ് വൈ ഇറ്റ് കാൾഡ് 'ബാക്ക് വാട്ടർ ടുറിസം' " !!!!!

അത് കേട്ട് അവിടെയുള്ള എല്ലാരും ചിരി തുടങ്ങി. വളരെ സീരിയസ് ആയി ഉത്തരം പറഞ്ഞ ഞാൻ , ഇവർക്കൊക്കെ വട്ടാണോ എന്ന് ചിന്തിച്ചു . ഞാൻ മനപ്പൂർവം അവളെ ആക്കിയതാണെന്നു തെറ്റിദ്ധരിച്ചു HR പെൺകുട്ടി വീണ്ടും അടുത്ത ചോദ്യം ….

" ടെൽ മി എബൌട്ട് 'മെയിൽ ഷോവനിസം ' " ?

എന്തോന്ന് !!!!! ഈ വാക്കു ഞാൻ ആദ്യമായാണ് അന്ന് കേട്ടത് !! ഇതൊന്നും സ്‌കൂളിൽ പഠിപ്പിച്ചിട്ടില്ല ; ഞാൻ ആണെങ്കിൽ സ്‌കൂളിൽ പഠിപ്പിച്ച ഇംഗ്ലീഷ് പോലും അറിയാത്ത ദുർലൻ !! ആ എന്നോടോ ബാലാ !!!!

എന്തായാലും , പിന്നെയും എന്റെ ലോജിക്ക് വർക്ക് ചെയ്തു തുടങ്ങി !! ഇതിനു മുൻപ് ഇമ്മാതിരി ഒരു വാക്കു കേട്ടിട്ടുള്ളത് ' ജോർജ് ഗോര്ബച്ചേവ്വ് " എന്നതാണ് !!! കൊച്ചു കള്ളി, റഷ്യൻ പ്രസിഡന്റിന്റെ പേര് ചോദിച്ചു എന്റെ ജെനെറൽ നോളഡ്ജ് ടെസ്റ്റ് ചെയ്യുകയാണല്ലേ !!!!

കട്ട കോണ്ഫിടെൻസിൽ ഞാൻ പറഞ്ഞു ... " ഐ തിങ്ക് , ഹി ഈസ് ദി കറന്റ് റഷ്യൻ പ്രസിഡന്റ് " !!!!

അപ്പോഴേക്കും ആ മുറിയിലാകെ ഉറക്കെ കൂട്ട ചിരി മുഴങ്ങി !! ഒന്നും മാനസ്സിലാവാതെ ഈ പാവം ഞാൻ !!!! കലികയറി ഹാലിളകി ആ HR പെൺകുട്ടി അവിടെ അലറി .....

" ഗെറ്റ് ഔട്ട് …. ഗെറ്റ് ഔട്ട് നൗ ... ഇനി മേലിൽ നിന്നെ ഈ പരിസരത്തു കണ്ടു പോകരുത് " !!!!

അങ്ങനെ , അന്ന് അവിടെ 'ബാക്ക് വാട്ടർ ടുറിസം' , 'മെയിൽ ഷോവനിസം' തുടങ്ങിയവ വാക്കുകൾക്ക് , രണ്ടു പുതിയ ഡഫനിഷനുകൾ ഈ ലോകത്തിനു സംഭാവന ചെയ്തു , ഞാൻ അടുത്ത കമ്പനി ഇന്റർവ്യൂകളിലേക്കു നടന്നു നീങ്ങി ...... വീണ്ടും പുതിയ ഇംഗ്ലീഷ് വാക്കുകൾ പഠിക്കാനും , അതിന്റെ അർഥം ഈ ലോകത്തെ പഠിപ്പിക്കാനും !!!!!!

.... സെലിബ്രിറ്റി മോമെന്റ്റ് .... ( ഒരു തീവണ്ടി അനുഭവം )

ഫേസ്ബുക്ക് ജനകീയമാകും മുൻപുള്ള ഒരു കാലഘട്ടം. അന്നും ഞാൻ ഇത് പോലെ ഓഫീസിലിരുന്ന് പോസ്റ്റുകൾ ഉണ്ടാക്കി , അത് അവിടെയുള്ള കൂട്ടുകാർക്കു ഓഫീസ് ഇമെയിലിൽ അയച്ചു കൊടുത്തു , അത് അവർ അവരുടെ കൂട്ടുകാർക്കു ഫോർവേഡ് ചെയ്തു , കിട്ടുന്ന ലൈക്കുകൾ/കമന്റുകൾ മെയിൽ റിപ്ലൈ ആയി വാങ്ങിക്കൊണ്ടിരുന്ന സമയങ്ങൾ.


ആ കാലത്തു എനിക്ക്  ഉണ്ടായ ഒരു   'സെലിബ്രിറ്റി' അനുഭവം ആണ് ഈ പോസ്റ്റ് ....


ഒരിക്കൽ , തിരുവനന്തപുരത്തു നിന്നും മാന്ഗ്ലൂർക്കുള്ള, വെള്ളിയാഴ്ച രാത്രി മാവേലി എക്സ്പ്രസ്സിലെ  എന്റെ ടിക്കറ്റ് കൺഫേം  ആയോ എന്നറിയാൻ , പ്ലാറ്റുഫോമിൽ നിർത്തിയിട്ടിരിക്കുന്ന ട്രെയിൻ ബോഗിയിലെ നോട്ടീസ് ഞാൻ ഒത്തു നോക്കി .....


സീറ്റ് 23 ജബ്ബാർ M  40 QLN CLT
സീറ്റ് 24 നാൻസി  F  22 TVM CAN
സീറ്റ് 25 കുമാരൻ  M  54 TVM KGQ  
സീറ്റ് 26 ഷഹീം  M  28 TVM MAQ


പെട്ടെന്നാണ് ആ പേര് കണ്ണിൽ കുത്തി തറച്ചു കയറിയത് .... 'നാൻസി  F  22' ...


അടുത്തെങ്ങും വേറെ CAN ഇറങ്ങുന്നവരില്ല . അപ്പോൾ കക്ഷി ഉറ്റയ്ക്കാണ് !! എന്തായാലും ജബ്ബാറിന്റെയും കുമാരന്റെയും ആരുമാകാൻ വഴിയുമില്ല ഈ നാൻസി കുട്ടി ... ശെടാ !! ഇനിയിപ്പോൾ ഞാൻ ഈ അലമ്പ് ലുക്കൊക്കെ മാറ്റി ,  മുടിയൊക്കെ ചീകി ഒരുങ്ങി, ബുദ്ധിജീവി പോലെ  ഇരിക്കണമല്ലോ !! പെട്ടെന്ന് അടുത്ത് കണ്ട ബുക്ക് സ്റ്റാളിലെ ചേട്ടനോട് പറഞ്ഞു .....


" ചേട്ടാ ... ഏതേലും നല്ല ലുക്കുള്ള ഇംഗ്ലീഷ് മാഗസിൻ ഒരെണ്ണം ... " ( അല്ലേലും , പെണ്കുട്ടികളെ  ഇമ്പ്രെസ്സ് ചെയ്യാൻ നല്ലതു ആംഗലേയം ബുക്ക് തന്നെയാ !! )


'മാഗസിന്റെ പേര് പോലും പിടിയില്ലാത്ത ഇവൻ ഏതേടാ ?' ഇതെന്ന പുച്ഛ ഭാവത്തിൽ നോക്കി , കടക്കാരൻ ചേട്ടൻ എന്നെ നോക്കി , ഇന്ത്യ ടുഡേ ഇംഗ്ലീഷ് മാഗസിൻ എടുത്തു തന്നു . അതുമായി ചാടി ട്രെയിനിൽ സീറ്റ് 25-ഇൽ ചാടി കയറി ,  24-ഇലെ  നാൻസിയെയും കാത്തു  , ആ ബുക്കിലെ കട്ട ഇംഗ്ലീഷും തപ്പിപ്പിടിച്ചു വായിച്ചോണ്ടിരുന്ന എന്റെ മുന്നിലേക്ക് , പരുഷമായ ഒരു ശബ്ദം ...
" കുറച്ചങ്ങോട്ടു മാറി ഇരിക്കണം മിസ്റ്റർ "


സീറ്റ് 25 ഇലെ കുമാരൻ ചേട്ടനാണ്  ! പുറത്തെ ലിസ്റ്റ് നോക്കി വന്നിട്ട് , നാന്സിയെ അവിടെ സീറ്റിൽ കാണാത്തതിനെ ദേഷ്യം അങ്ങേരു എന്നോട് തീർത്തതാണെന്നു തോന്നുന്നു. !!!
"ഇവിടെ എവിടെയെങ്കിലും ഇരിക്ക് ചേട്ടാ ." എന്ന് നൈസിനു പറഞ്ഞ എന്നോട് അങ്ങേരു ചൂടായി പറഞ്ഞു . "എന്റെ സീറ്റ് 25 ആണ് , എനിക്കവിടെ തന്നെ ഇരിക്കണം "
ഓഹോ ! അപ്പോൾ ഉറപ്പാണ്. ഇതിപ്പോൾ 24 -ഇലെ നാൻസിയുടെ പേര് കണ്ടിട്ടുള്ള വരവ് തന്നെയാണ് മൂപ്പിലാൻ ... !!


അങ്ങനെ . ട്രെയിൻ പതുക്കെ മൂവ് ചെയ്തു തുടങ്ങിയിട്ടും ആളൊഴിഞ്ഞിരിക്കുന്ന സീറ്റ് 24 നോക്കി മ്ലാനത്തോടെ  ഞങ്ങൾ ഇരിക്കുമ്പോൾ ഒരു മധുര ശബ്ദം ... "എക്സ്കയുസ് മി , പ്ളീസ് ..".....


[ അതാ ... ടെക്‌നോപാർക്കിലെ ഒരു കമ്പനിയുടെ ബാഡ്‍ജ്ജും കഴുത്തിലണിഞ്ഞു , സുന്ദരിയായ നാൻസി മുന്നിൽ !!! മനസ്സിൽ അഞ്ചാറു ലഡ്ഡുകൾ ഒരുമിച്ചു പൊട്ടി !! ഇനിയിപ്പോൾ എങ്ങനെ തുടങ്ങണം എന്ന കൺഫ്യൂഷ്യൻ വേണ്ട . ഗ്യാപ്പ് കിട്ടുപ്പോൾ "കുട്ടി ടെക്‌നോപാർക്കിലാണല്ലേ ...  " എന്നങ്ങു ഐശ്വര്യമായി തുടങ്ങിയാൽ മതി .... ! ]


' യെസ്  ' എന്നും ജാടയിൽ പറഞ്ഞു  ഞാൻ സീരിയസ് ആയി  മാറി ...  കുമാരേട്ടൻ അപ്പോൾ ആദ്യമായി ആ ഗൗരവ മുഖത്ത് നല്ല ഇളിച്ച ചിരി പടർത്തി , 'മോള് കയറിക്കോളൂ' എന്നും വാത്സല്യത്തിൽ  'റെമോയെ' പോലെ  പറഞ്ഞു , എഴുന്നേറ്റു മാറികൊടുത്തു, എന്നിട്ടു എന്നെ 'അന്യനെ' പോലെ  തുറിച്ചു നോക്കി !!!


നല്ലൊരു അവസരം ഒത്തുവരുമ്പോൾ ഒന്ന് കയറി മുട്ടാൻ, നാൻസി എന്നെ നോക്കുന്നുണ്ടോ എന്ന് ഒളിഞ്ഞു നോക്കി ഞാനും ; അവസരം കിട്ടാതിരിക്കാൻ ഞാൻ നാന്സിയെ നോക്കുന്നുണ്ടോ എന്ന് എന്നെ തുറിച്ചു  നോക്കി കുമാരേട്ടനും, ഇഞ്ചോടിഞ്ചു വാശിയോടെ  സമയം തള്ളി നീക്കി ....


അതിനു ഇടയ്ക്കു , കുമാരേട്ടൻ ഒന്ന് നടു നിവർത്തിയ ചെറിയ  ഗ്യാപ്പിലൂടെ , ഞാൻ നാൻസിയോട് കയറി മുട്ടി  .... "ടെക്നോപാർക്കിലാണല്ലേ ? ഞാനും അവിടെയാണ് ...."


'നിന്നോട് ഞാൻ ചോദിച്ചോടാ  അലവലാതി ' എന്ന ഒഴിഞ്ഞ ഭാവത്തിൽ നാൻസി ' ഓക്കെ '  എന്നും പറഞ്ഞു മിണ്ടാതെ ഇരുന്നു
വായിനോക്കികൾക്ക് ഔചിത്യമില്ലാത്തോണ്ട് വീണ്ടും കയറി  ഡയലോഗ് . " ബൈ ദി വേ , എന്റെ പേര് ഷഹീം , നെസ്റ്റിലാണ് വർക്കിംഗ് ..."


അപ്പോഴേക്കും കുമാരേട്ടൻ ഞങ്ങളുടെ നടുവിലുള്ള സീറ്റിൽ നടു നിവർത്തി കഴിഞ്ഞിട്ടു ,'ഞാനൊന്ന് നീങ്ങിയപ്പോളേക്കും നീ പണിതുടങ്ങിയല്ലേടാ " എന്ന ഭാവത്തിൽ ,ഞങ്ങളെ മറഞ്ഞു ഇരുന്നു.  വീണ്ടും വീണ്ടും എന്നെ നോക്കി പേടിപ്പിച്ചു.


ഇനിയിപ്പോൾ പ്രത്യേകിച്ച്  അവിടെ കുത്തിയിരുന്നിട്ടു കാര്യമില്ലെന്നു ഓർത്തു , മര്യാദയ്ക്ക് കിടന്നുറങ്ങാം എന്ന് കരുതി എഴുന്നേറ്റ എന്റെ കണക്കുകൂട്ടലുകൾ തെറ്റിച്ചു, പെട്ടെന്ന്  നാൻസി എന്തോ ഓർത്ത് ചാടി എഴുന്നേറ്റു , അതിശയത്തിൽ ...
" ഓ മൈ ഗോഡ് !! നിങ്ങളാണോ ഷഹീം ... !! ഐ കാൻഡ് ബിലീവ് ഇറ്റ് !! .. ഒരു മിനിറ്റേ .... "  എന്നും പറഞ്ഞു നാൻസി ആരെയോ ഫോൺ വിളിച്ചു തുടങ്ങി ....


അവിടെ എന്താണ്  നടക്കുന്നതെന്ന് അറിയാത്ത ഷോക്കിൽ ഞാനും , ഇതൊക്കെയെന്തെന്നറിയാതെ ഞങ്ങളെ രണ്ടു പേരെയും മാറി മാറി നോക്കി  തലയും ചൊറിഞ്ഞു കുമാരൻ അണ്ണനും അവിടെ ഇരുന്നു.
ട്രെയിനിന്റെ ചങ്ങല വലിച്ചു ഇറങ്ങി ഓടിയാലോ എന്നെനിക്കു ആദ്യം തോന്നി ! ശെടാ , അതിനു ഞാൻ തെറ്റൊന്നും ചെയ്തില്ലല്ലോ . അത് പോലെ നാൻസി എന്നെ ചീത്തയും വിളിച്ചില്ല. ഓടേണ്ട , അത്  പണിയാകും ... അങ്ങനെ ഓരോന്ന് ചിന്തിച്ചു വിയർത്തൊലിച്ചു ഇരിക്കവേ , ആരെയോ ഫോണിൽ അപ്പുറത്തു കിട്ടിയ നാൻസി ആവേശത്തിൽ .... " എടിയേ , നിനക്ക് എന്റെ  അടുത്ത് ട്രെയിനിൽ ഇരിക്കുന്നത് ആരാണ് എന്നറിയോ ? ഷഹീം ...... ഞാൻ ഫോൺ കൊടുക്കാമേ ... "


അത് കേട്ട്, എന്നെ പയ്യെ ഞൊണ്ടി പുഞ്ചിരിച്ചു ബഹുമാനത്തോടെ കുമാരൻ ചേട്ടൻ .... " സാർ സീരിയൽ നടനാണോ ? "!!!!!


എനിക്ക് വട്ട് ആയതാണോ , അതോ മറ്റെല്ലാവർക്കും പ്രാന്തായതാണോ , ഇനിയിപ്പോൾ നാൻസി എന്നെ ആക്കുന്നതാണോ , എന്നൊന്നുമറിയാതെ വണ്ടറടിച്ചു ഇരിക്കുന്ന എന്റെ കയ്യിലേക്ക് നാൻസി തന്ന ഫോണെടുത്തു , കരയുന്നതു പോലെ ഞാൻ .... " ഹാലോ ... ആരാത് ...  ഞാൻ സത്യായിട്ടും ഒന്നും ചെയ്തില്ല ... " !!!


അപ്പോൾ അപ്പുറത്തു നിന്നും ഒരു പരിചിത സ്വരം .. " ഡാ ... ഇത് ഞാൻ ആണെടാ ദീപ്തി ...."


നടന്ന സംഭവം ചുരുക്കി പറഞ്ഞാൽ ഇങ്ങനെ :: " കമ്പനിയിലെ എന്റെ പ്രോജക്ട് ടീം മേറ്റും , അടുത്ത കൂട്ടുകാരിയുമാണ് ദീപ്തി. ദീപ്തിയുടെ ഹോസ്റ്റൽ റൂം മേറ്റ് ആണ് നാൻസി . എല്ലാ ദിവസവും വൈകിട്ട് റൂമിലിരുന്ന് ദീപ്തി പറയുന്ന ഓഫീസ് തമാശ കഥകളിലൂടെയും , ഫോർവേഡ് ചെയ്തു അയക്കുന്ന മെയിൽ പോസ്റ്റുകളിലൂടെയും,   ആ കട്ടപ്പന ഹോസ്റ്റലിലെ  ഹൃതിക് റോഷൻമാരാണ് ഞാനും , എന്നെപ്പോലുള്ള കമ്പനിയിലെ മറ്റു പലരും .. !!!

അങ്ങനെ , ആ ടെൻഷൻ സിറ്റുവേഷൻ ഒക്കെ മാറി, ,  ഞാനും നാൻസിയും ഓരോ തമാശകളൊക്കെ പറഞ്ഞു അവിടെ പൊട്ടിച്ചിരിക്കുമ്പോൾ , ഞങ്ങളെ ദയനീയമായി നോക്കി താടിയിൽ കയ്യും വെച്ചിരിക്കുന്ന കുമാരൻ ചേട്ടനോട് ,  ഞാൻ ....

"  എക്സ്കയുസ് മി അങ്കിൾ ... ഞങ്ങൾ ഫ്രണ്ട്സ് ഇവിടെ സംസാരിച്ചു അടുത്തിരിക്കട്ടെ ... ചേട്ടൻ കുറച്ചങ്ങോട്ടു നീങ്ങിയിരിക്കു ... പ്ളീസ് .. " !!!!!!


< .... ദി എൻഡ്  >

ഒരു ഉത്തരാധുനിക കവിത :: ...... " ഞാൻ " ......

അടുത്തിടെ , കവി സുധാകരന്റെ 'പൂച്ചേ പൂച്ചേ ' എന്ന മനോഹര കാവ്യം വായിച്ചതിൽ പിന്നെ , എന്നെ കൊണ്ടും കവിത എഴുതാൻ പറ്റും എന്ന ഒരു വിശ്വാസം വന്നു .!!


അടുത്ത കൊല്ലത്തെ പുല്ലാങ്കുഴൽ അവാർഡിനായി , മഹാ കവി ഞാൻ എഴുതിയ , ഒരു ഉത്തരാധുനിക കവിത ::


...... " ഞാൻ " ......

" എന്റെ പാദങ്ങൾ ഇന്ന് ഈ ഭൂമിയുടെ
കനക സിംഹാസനത്തിന് മുകളിലാണ്....


അധികാരത്തിനായുള്ള എന്റെ അത്യാഗ്രഹം
ഇപ്പോൾ മറ്റു ഗ്രഹങ്ങൾക്കെതിരെ നീളുന്നു.


എന്റെ വിരൽത്തുമ്പുകൾ
സർവ ലോക നിയന്ത്രണത്തിൻ
കടിഞ്ഞാൺ തിരച്ചലിലാണ്....


സ്വർഗ്ഗത്തെക്കുറിച്ച് എല്ലാം എനിക്കറിയാം,
കാരണം, ദൈവത്തെ സൃഷ്ട്ടിച്ചത് ഞാൻ ആണ്.


ഈ സ്വർഗ്ഗ ഭൂമിയെ ഞാൻ പലതവണ
നരകത്തിലേക്ക് തിരിച്ചു കൊണ്ട് പോയിട്ടുണ്ട്.


മറ്റുള്ളവരുടെ മനസ്സിന്റെ വികാരാധീനമായ
പിടിച്ചെടുക്കൽ എനിക്കറിയാം.


സ്വന്തം ബുദ്ധിയിലും ധൈര്യത്തിലും ,
മറ്റുള്ളവരുടെ രക്തത്തിലും
എന്റെ വിജയഗാഥകൾ മുഴങ്ങുന്നു.


'ഈ ലോകം നശിക്കുന്നു' എന്ന് വായിക്കുന്ന
എല്ലാ അടയാളങ്ങളിലും ഞാൻ ഉണ്ട്.


എന്റെ പേര് "മനുഷ്യൻ",


ഞാൻ ഈ പ്രപഞ്ചത്തിലെ
ഏറ്റവും വലിയ അഹങ്കാരിയാണ്. "


< ദി എൻഡ് >
( ഹോ !! കവിത എഴുതി കഴിഞ്ഞപ്പോൾ എന്തൊരാശ്വാസം ... !!! )

... " പ്രേതവും പ്രിയതമയും " ....

[ ... രാത്രി ഉറങ്ങാൻ കിടക്കും നേരം,  കൊച്ചു കുട്ടികൾക്ക് പേടിപ്പിക്കുന്ന കഥകൾ പറയുന്ന , അച്ചന്മാർക്കുള്ള ഒരു ഉപദേശം ആണ് ഈ കഥ .... ]


കൊച്ച്   :: " ഒരു കഥ പറഞ്ഞു തരുമോ  .. "


അച്ഛൻ :: " എന്ത് കഥ ... ഒന്ന് കിടന്നുറങ്ങു കൊച്ചേ ..."


കൊച്ച്   :: " ഒരു കഥ .. ഒരൊറ്റ കഥ .. പ്ളീസ് ..."
അച്ഛൻ :: " ഒക്കെ  .. ഒക്കെ ... ഒറ്റ ഒരെണ്ണം ...വൺസ്  അപ്പോൺ എ ടൈം , ദെയർ  ഈസ് ..... "


കൊച്ച്   :: " 'വൺസ്  അപ്പോൺ' എന്ന് വരുമ്പോൾ 'ദെയർ  വാസ്' അല്ലേ ? , 'ഈസ്' അല്ലല്ലോ ? " !!!


അച്ഛൻ :: " ദാണ്ടെ ഞാൻ ഒരു കാര്യം പറഞ്ഞേക്കാം .... കഥയിൽ ചോദ്യമില്ല !!!!... ഞാൻ കഥ പറയുമ്പോൾ ഇടയ്ക്കു ഇങ്ങോട്ടു കയറി ചോദ്യം ചോദിക്കരുത് .... പിന്നെ , ഇനി ഞാൻ മലയാളത്തിലേ കഥ പറയു .. അതും പറഞ്ഞേക്കാം ..... "


കൊച്ച്   :: " ശെരി ശെരി .... എന്നാൽ , ഒരു ഗോസ്റ്റ്  സ്റ്റോറി  പറഞ്ഞു തരുമോ ? "


അപ്പോൾ, പ്രിയതമ ... " രാത്രി വെറുതെ പേടിയാവുന്ന കഥ നിങ്ങൾ പറയാൻ നിൽക്കരുത് ... ,  മനുഷ്യർക്ക്  ഇവിടെ സമാധാനമായി ഉറങ്ങണം  ... "


അച്ഛൻ :: " പ്രേതമെങ്കിൽ പ്രേത കഥ ... പണ്ട് പണ്ട് ... ഒരു കൂറ്റൻ
ബംഗ്ളാവ് ............... പാതി  രാത്രി .. അങ്ങ് ദൂരെ ... ദൂരെ ..... ദൂരെ ..... ഒരു ശബ്ദം ..... "


വീണ്ടും  പ്രിയതമ  ... " ഇതാ  .. ഞാൻ വീണ്ടും പറയുകയാണ്  ... മനുഷ്യർക്ക്  ഇവിടെ സമാധാനമായി ഉറങ്ങണം  ... "


അച്ഛൻ :: " അങ്ങനെ രാത്രിയിൽ , ദൂരെ ഒരു ശബ്ദം .... പട്ടി ഓരിയിടുന്ന പോലെ  ..."


കുറച്ചു കഴിഞ്ഞു , ആ കഥകേട്ട് ബോർ അടിച്ചു ഉറങ്ങി പോയ  മോളെ നോക്കി അച്ഛൻ .....


"  ശെടാ !!! എന്നോട് കഥപറയാൻ പറഞ്ഞിട്ട് കൊച്ച്  അപ്പോഴേക്കും പെട്ടെന്ന്  ഉറങ്ങിയോ ....  "


തിരിഞ്ഞു നോക്കി , " അപ്പോൾ , ഇനി ഞാൻ മാത്രമേ ഉള്ളോ ഇവിടെ ഉറങ്ങാൻ .....   "


അങ്ങനെ , കുറച്ചു നേരം അങ്ങോട്ടും ഇങ്ങോട്ടും തിരിഞ്ഞു കിടന്നു ഉറക്കം വരാതെ, അച്ഛൻ  ...


" എടിയേ .... എടി  ,  നീ ദൂരെ എന്തേലും ശബ്ദം  കേട്ടോ  .... പട്ടി ഓരിയിടുന്ന പോലെ എങ്ങാനും  ..." !!!


അപ്പോഴേക്കും അലറി വിളിച്ചു പ്രിയതമ  ...

" ഞാൻ അപ്പോഴേ പറഞ്ഞതല്ലേ .... വെറുതെ രാത്രി പേടിയാവുന്ന കഥ  പറയാൻ നിൽക്കരുത് എന്ന്  ... ,  എനിക്കറിയാമായിരുന്നു  ഓരോ പ്രേത  കഥ പറഞ്ഞിട്ട് , നിങ്ങള് അതാലോചിച്ചു പേടിച്ചു കിടന്നുറങ്ങാതെ, മറ്റുള്ളരെ കൂടി ശല്യപ്പെടുത്തുമെന്നു ...   " !!!!!


അച്ഛൻ  :: " എന്റമ്മോ !!!! എന്റമ്മമോ !!! നീ ഉറങ്ങു പ്രിയതമേ .... ഇതിനേക്കാൾ  നല്ലതു 'പ്രേതം'  വരുന്നത് തന്നെയാണ് ... "


അങ്ങനെ , ധൈര്യവാനായ ആ അച്ഛൻ , തന്റെ കണ്ണുകൾ ഇറുക്കി അടച്ചു , അറിയാവുന്ന പ്രാർത്ഥനയൊക്കെ ചൊല്ലി , ഇനിമേലിൽ താൻ രാത്രി കുട്ടികൾക്ക് പ്രേതകഥ പറഞ്ഞു കൊടുക്കില്ലെന്ന് ശപഥം ചെയ്തു .

.... ഒരു പനി കഥ ...

ഇവിടെ നടക്കുന്ന 'വൈറൽ ഫ്ലൂ' സീസൺ ആഘോഷത്തിന്റെ ഭാഗമായി , കഴിഞ്ഞ ഞായറാഴ്ച വൈകിട്ടായപ്പോഴേക്കും , എനിക്ക് ചെറിയ ശരീര വേദനയും, വിറയലും, പനിയും...

അപ്പോഴേ ഭാര്യ മര്യാദയ്ക്ക് പറഞ്ഞു , ഇനിയിപ്പോൾ ഒരാഴ്‌ച വീട്ടിൽ അടങ്ങി ഒതുങ്ങി പുതച്ചു കിടന്നോളു. ഇനിയിപ്പോൾ നിങ്ങളായി ആചാരങ്ങൾ തെറ്റിക്കേണ്ട.

പക്ഷെ , കമ്പനിയോടുള്ള സ്നേഹവും , പ്രോജെക്ടിലെ ആത്മാർത്ഥതയും മാനേജറോടുള്ള കൂറും വെച്ച് ഞാൻ പറഞ്ഞു ,

" അല്ല ... ഞാൻ പോയില്ലേൽ ശരിയാവില്ല.. എല്ലായിടത്തും എന്റെ കണ്ണ് തന്നെ എത്തണം എന്ന് വെച്ചാൽ എന്താ ചെയ്യുക. അല്ലെങ്കിലും , ഇനിയിപ്പോൾ ഞാൻ അല്ലാതെ വേറെ ആരുണ്ട് കമ്പനിയിൽ എനിക്കൊരു പകരക്കാരൻ ആവാൻ ... ഇല്ല , ഞാൻ എത്ര കഷ്ട്ടപ്പെട്ടായാലും പോകും ..... " !!!

അടുത്ത ദിവസം , വളഞ്ഞു ഒടിഞ്ഞു കമ്പനിയിലേക്ക് രോഗിയായി കയറിയ എന്നെ കണ്ടതും , ആദ്യം മാനേജർ തന്നെ ചീത്ത വിളിച്ചു ....

" എടേ ... നിനക്കൊന്നും വേറെ പണിയില്ലേ !! ഞങ്ങൾക്കും കൂടെ പനി തരാനായി മിനക്കെട്ടു വരണോ ... അല്ലേലും ഇപ്പോൾ ഇങ്ങോട്ടു വന്നിട്ട് വലിയ കാര്യം ഒന്നും ഇല്ലല്ലോ ..... " !!

' ഒന്ന് പോ സാറേ കോമെഡി പറയാതെ ' എന്നും മനസ്സിൽ പറഞ്ഞു , അല്ലേലും അങ്ങേരെക്കാൾ കമ്പനിയോടും പ്രോജെക്റ്റിനോടും ആത്മാർഥത കൂടുതൽ എനിക്കാണല്ലോ എന്നൊക്കെ ആശ്വസിച്ചു , അന്നത്തെ പണി തുടങ്ങി !!!

ആദ്യത്തെ ഒരു മണിക്കൂർ ഓഫീസ് എ.സി യിൽ ഇരുന്നപ്പോൾ തന്നെ , പതിവ് പോലെ , എന്റെ എല്ലാ തീരുമാനങ്ങളും പോലെ , ഇതും ഒരു മണ്ടത്തരം ആണെന്ന് ഞാൻ തിരിച്ചറിഞ്ഞു. അടുത്തിരുന്നവൻ ഇടയ്ക്കു എന്നോട് 'നിങ്ങൾ മേശയിൽ താളമടിക്കാതിരിക്കൂ, പ്ളീസ് ", എന്ന് പറഞ്ഞപ്പോൾ ആണ് , അത് പനിയുടെ ശക്തിയിൽ ബോഡി മൊത്തം നല്ലോണം വിറച്ചു തുടങ്ങിയത് പിടികിട്ടിയത്. അതിന്റെ കൂടെ , ലീവെടുക്കാതെ ഓഫീസിൽ എത്തിയതിനാൽ , ഒരു മയവുമില്ലാതെ ചറ പറ പറന്നു പണിയുമെത്തി.

അങ്ങനെ , ഒരു വിതം അമാന്തിച്ചു കുറെ പേരുള്ള ഒരു മീറ്റിംഗിൽ ഇരിക്കുമ്പോഴാണ് , പങ്ങെങ്ങോ പറഞ്ഞ പണി ചെയ്തു തീർത്തില്ലെന്നും പറഞ്ഞു ചൂടിളകി ഒരു ഡയറക്റ്റർ മുന്നിൽ പ്രത്യക്ഷപ്പെട്ടു ചാട്ടം തുടങ്ങിയത്. അതിന്റെ ടെൻഷനും , പണിയുടെ ടെൻഷനും , പനിയുടെ ടെൻഷനും കൂടി ഒന്നിച്ചായപ്പോൾ , ഞാൻ അവിടെ അന്തസായി തലകറങ്ങി വീഴുകയും , ഇനിയിപ്പോൾ വീണ സ്ഥിതിക്ക് തൽക്കാലം ഇന്ന് നിർത്താമെന്നും , ഇനിയിപ്പോൾ ഇവൻ നാളെയെങ്ങാനും പൊങ്ങിയാൽ , ബാക്കി മീറ്റിംഗ് നാളെത്തേക്ക് മാറ്റാമെന്നും പറഞ്ഞു , എല്ലാ കൂട്ടവും തിരിഞ്ഞു നോക്കാതെ പിരിഞ്ഞു പോയി . അഞ്ചു മിനിട്ടു കഴിഞ്ഞപ്പോൾ , ചീത്ത വിളിച്ചു പോയ ഡയറക്റ്റർ മാത്രം ഒന്ന് തലയെത്തി നോക്കി സ്നേഹത്തോടെ ചോദിച്ചു , " നിനക്ക് ജീവനുണ്ടല്ലോ , അല്ലെ ? , ഞാൻ ചൂടായതോണ്ട് കൊണ്ടൊന്നും അല്ലല്ലല്ലല്ലോ നീ വീണത് ? " !!!

ഏതായാലും വൈകിട്ടോടെ , ഇനിയിപ്പോൾ ഒരടിമുന്നോട് വയ്യെന്നും , എന്തായാലും കണ്ണും മൂക്കും നാക്കും ചെവിയും എല്ലാം പണിമുടക്കിയെന്നും മനസ്സിലായി , ഒരുവിധം വീട്ടിലെത്തി പിന്നെ അടുത്ത നാല് ദിവസം, മൂടിപ്പുതച്ചു ഒറ്റ കിടപ്പ് ... !

ഈ ആഴ്‌ച, ഇനിയിപ്പോൾ എടുക്കാനായി ലീവില്ലെന്നു പറഞ്ഞു, പകുതി പ്രവർത്തനക്ഷമതമായ ശരീരവും വെച്ച് , ഓഫീസിലെത്തിയ ഞാൻ ഒഴിഞ്ഞു കിടക്കുന്ന റൂം നോക്കി, അവിടെ ഇരുന്നവനോട് ചോദിച്ചു ... " ഇവിടൊന്നും ആരുമില്ലേ .... ?"

അപ്പോളവൻ എന്നോട് ....., "കഴിഞ്ഞ ആഴ്ച ഇവിടെ അതോ മഹാ പാപി പനിയും കൊണ്ട് വന്നു കയറി , ഇപ്പോൾ ഇവിടെയുള്ള എല്ലാരും വൈറൽ അടിച്ചു വീട്ടിൽ കിടപ്പാണ് !! ഞാൻ അന്ന് ലീവ് ആയതു കൊണ്ട് മാത്രം കഷ്ട്ടിച്ചു രക്ഷപ്പെട്ടു ".... !!

അങ്ങനെ , ആ ആളൊഴിഞ്ഞ ഓഫീസ് മുറിയിൽ , ആരും ശല്യപ്പെടുത്താനില്ലാതെ സമാധാനമായി ഇരുന്നു റസ്റ്റ് എടുക്കുമ്പോൾ ഞാൻ ആലോചിച്ചു .... 

 

" ആരായിരിക്കും ആ മഹാ പാപി ... ഇനി അവനാകുമോ എനിക്കും പനി തന്നത് .... " !!!

< എൻഡ് ഓഫ് പനി >